Sagua

Sagua: 1) Ugaztun karraskaria, arratoiaren antzekoa, txikiagoa. 2) Ordenagailuari hainbat agindu emateko erabiltzen den gailu biribil antzekoa. Iruditeriak gizartean eragin zuzena duela defendatu izan dut, baina saguarekin hozka egiten diot mihiari. Herria saguaren alde dago fikzioan. Katuaren eta saguaren kalapita ikonikoan, katua da gaiztoa, sagua da babestu nahi duguna, zulotxoan gorde zaitez kantatzen dioguna, baina katuak daude etxeetan, eta sagurik ez bedi azaldu. Etxean saguren bat azaltzea mehatxua da, erratza ateratzeko edo aulkira igotzeko motiboa, eta saguen karraska entzunez gero, akabo. Fikzioan, ordea, izaki maitagarriak dira, xaloak, umeen samurtasun bertsukoak. Belaunaldi berriak liluratzen jarraitzen dute Mickey eta Minniek, Geronimo Stiltonen sagak, Tom eta Jerryk. Bertsotan ere bada doinu polit bat Sagutxo batzuekin izenekoa. Honela dio letrak: «Sagutxo batzuekin / bizi naiz ganbaran, / ez dakit hogei edo / hogeita bost geran. / Nik erakusten diet / saguei hizketan, / eta beraiek neri / berriz lapurretan. / Sagutxo batzuekin / bizi naiz ganbaran». Komeni saguekin ganbara metaforikoan bizitzea, ordenagailu ondokoaren ilea ez antzematea. Sagua, izter-sagua, esaten omen zaio barrabilari ere.