Hobetuz

Parte hartzea da kontua, beti ezin da irabazi, jakin egin behar da galtzen ere, kiroltasunez hartu behar da porrota, ondo zaude-eta, ezingo dugu kexatu, aberatsak pixka bat aberatsago dira orain, denak egingo du gora, gasak, argindarrak, bidesariek, behera ez dute egiten inoiz, guraize hotsa izugarria da, kendu hau, moztu hemendik, hau fuera, ez dago dirurik, batzuek badaukate ba, zenbatekoa da zerga-iruzurra urtero, eta zeinek egiten du, zeinek gordetzen ditu diruak Suitzako bankuetan, paradisu fiskaletarako sarrerak nahiago dituzte orain zerurakoak baino, zerrenda argitara eman zedin ez zuten nahi izan, kontrako botoa eman zutenen artean zegoen EAJ, bihotz oneko jendeak alderdiei ematen die dirua izena ezkutuan mantenduz, denok susmatzen ditugun negozioak egiten dituzte, Espainiako Defentsa Ministro berriaren enpresa zerrenda irakurrita ia arnasarik gabe geratu naiz, beti-betiko abizenak azaltzen dira PPk irabazten duen bakoitzean, aspalditik egiten zaizkizunak ezagunak, aulki dantza dago bogan, egon lo eta jango duk mehe, holaxe dago kontua, aurtengoa olinpikoa izango da, akordatzen igerilari beltz harekin, Moussambani, aurten krokodiloak botako dizkiote marka hobea egin dezan.