Gauzak zer diren. Denok badugu familia bat, baliteke hura maitatzea ere, derrigorrezkoa ez bada ere, ama guztiak zerutiarrak ez direla onartzea nahitaezkoa ez den gisa berean. Bada, hori, denok dugu familia bat, baina hitza, familia hitza, ez da halako red flag bat bihurtzen hasi? Ez luke behar, baina nik politikari bat familiaz mintzo entzun, eta segituan hartzen diot susmoa familia eredu bakarraz ari dela, zeinetatik benetako familia asko baztertuta eta kanpo utzita dauden.
Hatsarre unibertsal bihurtzeko bidean da. Erdogan presidentea Turkiako konstituzioarentzako emendakin bat prestatzen ari omen da, LGTBI-ren aurkakoa, familia babesteko, jakina. Adibideak ez dira hemen kabitzen.
Familiaren alde esan baina beste zerbaiten kontra esan nahi. Familia hitza balitz horrela gaizki tratatua den bakarra, gaitz erdi. Espainiako eskuinen arteko hitzarmen berriren batean dagoeneko iragarri dituzte «kultur aniztasuna»-ren aldeko lege eta neurriak. Valentzian, esaterako, kultur aniztasun horren kontrakotzat joko lukete bertako hizkuntzaren aldeko lana. Zoramena. Ulertzen zaila ere bada idatzian ikusitakoan. Nahastuko dut pixka bat gehiago. Familia-aniztasun kontzeptuak agian zirkuitulabur neuronala eraginen lieke.
JIRA
Familia
Iruzkinak
Ez dago iruzkinik
Ordenatu
