Dena ondo irtengo da

«Dena ondo irtengo da», esan dizu lagunak, eta zuk galdetu nahi diozu zer den «ondo», zer den «dena», nondik irteten den hemendik. Baina badira galderentzat ez diren egunak, edo egitekotan, erantzun laburreko galderak egin behar diren egunak —zer moduz zu, laster egongo gara, euria ari al du hor—, galdera bakoitzak norabait hurbildu ahala urruntzen gaituelako nonbaitetik, eta nik gaur ez dut lagunarengandik urrundu nahi. Dena ondo irtengo da. Bilbon Palestinaren aldeko manifestazioa da. «Genozidioa», «erresistentzia», «konplizeak» oihuak entzungo dira, baina nork esan dezake dena ondo irtengo denik. Atef Abu Saifek Donostiako Antzoki Zaharreko osteguneko agerraldian zioen balkoietako Palestinako banderen argazkiak bidaltzen zizkiela bere kideei, esateko «hemen jendeak babesten dituela», eta zuri, berriz ere, galdetzeko tentazioa etorri zaizu: non den «hemen», zein den «jendea», zer den «babestea». Baina gaur ez da galderentzako eguna. Halako egunetarako ez da helduleku txarra balkoietara begiratzea, kideez gogoratzea, eta sinistea jendeak babesten zaituela.