Bizikidetza

Arabarra da, zazpi senideetan andre bakarra, eta azken hamarkadak gurasoen zaintza-lanetan pasa ditu. Ama orain hiru urte hil zen, eta aita udaberrian. Gizarte Segurantzan familiarren aldeko prestazioa eskatu zuen alabak, baina ez zioten onartu. Lau dira jasotzeko baldintzak: 1) 45 urte baino gehiagoko ezkongabea, dibortziatua, edo alarguna izatea; 2) zaintzaren ardura frogatzea; 3) bizitzeko baliabide propioen falta; 4) zaindu dituzunekin bizikidetza mantentzea. Eskatzaileak ez zuen azkena betetzen. Ordea, bizilagunek testigantzak ematea erabaki zuten, adieraziz alaba komunitateko bilera guztietara joan zela, egunero ikusten zutela gurasoen etxera sartu-irtenean, medikua, paseoak, erosketak, dena alabaren ardurapean zegoela. Abokatuak, gainera, bere bezeroaren online erosketen zerrenda luze aurkeztu zuen; entrega guztiak gurasoen etxean egin ziren. Froga honekin magistratuak deliberatu zuen «bizikidetzaren betekizuna ez dela ulertu behar elkarbizitza fisiko eta materialaren zentzu hertsian», eta pentsioa jasoko du alabak. Marka da bizikidetza kaleko bizitza murrizten ari den arrastoak frogatzea.