Iñigo Astizek Pabiloien aroa deitu dio euskal musikagintzaren joera berriari. Astizen arabera, musika taldeek eurek sortutako makroekitaldien garaiak, testuingururik gabe sortutako euskararen zentraltasunaz gain, kultur ereduari buruzko eztabaida ere badakar, edo ekarri beharko luke bederen. «BECeko betekada ezin baita izan egunerokorik xeheenari lotutako kultur proiektuentzako babesa murriztearen bizkar».
Horrekin gogoratu naiz ordutik hona Kulturako orrietan irakurritako bi konturen harira.
Bata 111 Akademiak egin duen ohartarazpena: teknikari bat lortzeko ezina eta finantzaketa arazoak direla medio, euren jarduna «kinka larrian» dagoela salatu dute. Euskal Herriko literaturazaleen bilgunea da 111 Akademia. Egitasmoan irakurleek hartzen dute parte batez ere: liburuak irakurri, iruzkinak bidali, aldizkaria osatu, eta 1996tik banatzen da 111 Akademia sari estimatua.
Bigarrena, berriz, Joanmari Larrartek berripaper honetan egindako elkarrizketan esandakoa: liburu salmentek eta irakurketek hazkundea izan dutela Espainiako estatuan, baina hori ez dela gertatu euskarazko liburuetan.
Lurra estaltzen du pabiloiak.
