Ezkutaleku egokiak dira Richard Serraren artelan asko. Mundua haizea hartzera bidali, eta nekez aurkituko zaituzten nonbaiten gorde. Haur pentsakorraren paradisu; heldu iheslariaren leku kuttun.
Zendu berri den artista estatubatuarraren lanak goxo hartu genituen gurean. Guggenheimen, Miramar jauregian... Aukeran, hitzak ziren arranditsu. «Oteiza eta Txillidaren artelanekin etengabeko elkarrizketan» esaldia bezalakoek zalantzak sortu izan dizkidate beti. Euskarazko meme lehiaketa antolatu berrirako pagotxa. Baina onar dezagun Richard Serra bazela nor, bazekiela zer nahi zuen eta zertan ari zen. Akaso horrexegatik, polemika batean baino gehiagotan katigatu izan zen...
Xelebreena, zalantzarik gabe, duela ia hogei urte Madrilen gertatu zitzaiona. Aita Balear Uharteetakoa izaki, ezagutu behar zituen espainiarrak gutxi-gehiago, baina... Reina Sofia museoak bere Equal-Pararell/Guernica-Bengasi artelana galdu egin zuen. Eta ez zirudien erraz-erraza, 38 tonako altzairuzko lau zatik osatzen baitzuten. Behin-behineko gordailua industrialde batean zegoen lokal erraldoi bat zela, kendu egin ziotela lokala gordailuaren arduradunari, hustu zutenek ez zekitela zer zeramaten... Kontuak kontu, ezkutalekua ezkutatzea lortu zuen artistaren batek.
