Beste eztabaida juridiko interesgarri bat, bereziki etikoa dena. Noraino irits liteke bere burua demokratikoa eta eredugarria dela dioen Polizia? Zer muga dauka, legea? Legea bakarrik?
Ostera sartu da albisteen agendan Kataluniako mugimendu independentziazale eta sozialetan infiltratu eta, informazioa lortzeko asmoarekin, mugimendu horretako hainbat kiderekin harreman afektibo-sexualak eduki dituzten polizien auzia; tartean, zortzi emakumerena. Poliziaren jukutriaren biktimek auzitara jo zuten, baina Bartzelonako instrukzio auzitegiak lehendabizi, eta Lurralde Auzitegiak ondoren, uko egin diote ikerketa zabaltzeari, harreman horiek borondatezkoak izan zirela argudiatuta.
Legearen interpretazio literalak esango digu ez dagoela bortxakeriarik harreman afektibo-sexual horietan, eta harreman tipologia horretan gezurra esatea libre dela. Hala izanda ere, jokabide etikoa da?
Infiltrazioa egiteko orduan Poliziak edukiko duen estrategiaren muga etikoa errebisatzera eraman beharko gintuzke Kataluniako auziak, eta garbi uztera dena ez dela zilegi.
Argitu beharreko beste puntu bat: legala izan beharko luke Polizia infiltratzea deliturik (independentzia, presoen eskubideak, nuklearrak, etxegabetzeak…) egiten ez dituzten mugimenduetan? Ez badira delitu…
Ez baitira gauza bera kontrolatzea eta infiltratzea.
