Interes handia piztu du Europa osoan Parisko epaitegi bateko magistratuek RN Batasun Nazionaleko buru Marine Le Peni —Europako Parlamentutik jasotako diruaren erabilera okerra egiteagatik— ezarritako zigor bikoitzak: lau urteko kartzela zigorra eta bost urterako inhabilitazioa.
Frantziako hurrengo presidentetzarako hauteskundeak 2027an direnez gero, askok ondorioztatu zuten Le Pen ezin izango dela aurkeztu epaileek 2030 arte inhabilitatu dutelako. Ez du ematen inhabilitazioa automatikoa denik, Le Penek iragarri baitu helegitea jarriko duela Parisko Apelazio Auzitegian. Aukera gutxi dauka Le Penek, hala ere, inhabilitazioa indargabetzeko, zigortu duten epaileek sinatutako epaian oso modu sendoan azaldu dutelako delitua egin zutela Le Penek eta alderdiko 23 kidek.
Eztabaida juridiko-politikoa hauspotu du Le Penen zigorrak: martiri bihurtuko dute epaileek RN Batasun Nazionaleko burua? Zer egin behar du Justiziak horrelako ondoriotik ez izateko? Ezer berezirik ez: berme guztiekin epaitu eta, hala badagokio, zigortu. Zigortutakoa biktima bihurtuko duten pentsatzeak ezin du desbideratu justiziaren zeregin nagusia. Gainerako bidezidorrek ez dakarte ezer onik.
Le Pen martiri izango da bere ingurukoentzat; baina ustela aurkari politikoentzat, zigorra politikoki ondo erabiltzen asmatzen badute.
