Urte asko igaro dira ETB1 sortu zenetik, berrogei baino gehiago, eta beste horrenbeste egunotan 45. urteurrena ospatzen ari den Eusko Legebiltzarrak euskararen erabileraren legea onartu zuenetik. Ia mende erdia, gehiegi euskarari buruz ikusten ari garen zenbait eztabaida normaltzat jotzeko.
Euskara murrizten duten erabakiak ez datoz beti toga jantzita daramaten magistratu unionista batzuen eskutik; duela berrogei urte inolaz ere pentsatuko ez genukeen esparru batetik etor litezke.
Zutabegile hau ez da esku beltzen eta tesi konspiranoikoen zale, baina ezta kasualitate hutsetan sinestearen aldeko ere. Hiru adibideren berri jakin dugu egunotan, hirurak zer pentsa ematen dutenak.
Kutxabankeko lehendakari Anton Arriolak esan zuen euskara eragozpena izan litekeela kanpoko talentua erakartzeko; Bizkaiko Aldundiak jaitsi egingo du euskara eskaera lan deialdi publikoetan, aurreko deialdien aurkako epaiak irmoak izan arte, eta EITBko zuzendari nagusiak ontzat jo du Eusko Legebiltzarrean egindako agerpen batean albistegietako goi arduradun batek euskaraz hitz egiteko gaitasunik ez edukitzea.
Hiru. Hirurak etxekoek egindakoak, hirurak esparru politiko berekoak, eta hirurak Bilbokoak. Kasualitatea? Edo inguru batzuetan birplanteatzen ari dira urrutiegi joan garela euskararekin?
Hala bada, alferrik daude magistratuak.
