Ez dakit ni bezalakoak zareten... baina nik, kasik goiz oroz, eta badu hamarkadak, ez dudala urrats mikorik egiten Sud-Ouest izparringiko horoskopoaren aholkuak irakurri gabe. Garai urrun batean, aitor dut, Egunkaria-koak azpatzen zidala bizitzaren norabidea, euskara pür eta dür batean! Bistan dena, ez dut sinesten iragarpen horietan, nahiz eta interesatzen zaizkidan asko literaturaren ikuspuntutik. Astroen eta izarbelen menpe nago txikitatik, ilargiaren egoera aldaketa bakoitzak demagun, loa ebasten didala oraindik ere. Halaber planetak lerroan jartzen direnean Esne Bidearen ipularretan. Sky tonight aplikazioarekin, Oragarre Oihanarteko loriotik, gaua zohardi tipil denean, ahariaren konstelazioa bilatzen dut han hara, justu Andromedaren eta Hirukiaren auzunean.
Nire zeinu astrologikoa ez da opari bat: eskorpioi jatorriko ahari adardunetatik naiz. Nola bizi horrelako destino karga zakar batekin, gehienetan gauzak egiten ditugulako, gero deboilaren minean hausnartzeko. Hargatik gustatzen zait, alabaina, maitasuna, lana, dirua eta osagarriarekiko azalpenak oro baikor dabilzkidanean. Eta nori ez?
