Erran gabe doa mundu berri baten itxura jazartzen ari zaigula iragan urtarrilaren 21az geroztik. Egun hartan Trumpek —Silicon haraneko buruzagi okituen mutilak— zin egin zuen, eta ordutik hona, planeta hau bortxa salbaiaren eremua bilakatua da. Macron presidentearen analisia ez da txarra: nazioarteko erreakzionarioen ofentsiba bateratua aipatzen du, Washington, Mosku, Ankara edo Buenos Aires zaku berean sartuz. Nik Paris ere gehituko nioke laukote horri. Hiru korronte ideologiko nagusi biltzen dira beraz progresismoaren kontra borrokatzeko: kristau ultra kontserbatzaileak, populista nazionalistak eta tekno-libertarianoak deitzen direnak. Bat-batean globoa beraiena da.
Behialako marxistek kantatzen zuten bezala, iraganaz tabula rasa egiteko asmoa dute eta mila aurpegi dituen zapalkuntzaren norabide aldaketa ironiko baten bihurgunean beraiek dira damnatuak eta besteak beste, ekologisten zein feministen biktima sufrituak. Harrigarriena zera da: ideologia hori mailarik maila deklinatzen dela, Euskal Elkargoaren iragan asteko erabaki baten karietara adibidez, Emisio Gutxiko Eremua Lapurdin hedatzeko xedea abandonatzeraino.
