Berri ona da, lehen aldiz emaztea eta Zimbabweko kirolari ohia Nazioarteko Olinpiar Batzordeko presidentea bilakatu izana. Berri are hobeagoa zatekeen larruz beltza izan balitz. Baina dena batera ezin... Orain, badakigu, datozen zortzi urteetan, Trump presidente omnipotentearekin pataskatu beharko duela Kirsty Coventryk, hortzetik hortzera, bereziki 2028an Los Angelesen iragarriak diren Olinpiar Jokoetako funtsezko arauak finkatzeko orduan. Gay eta trans atletak, belatuak izan ala ez, ikusiko al ditugu olinpiar medailak papoan? Horixe da kezka nagusia.
Zazpi familietako Trumptarren karta jokoan, Donald aitaren ondotik, kirol arloaz axolatzeko prest da Junior, seme gehiena: dopina zilegi duketen Enhance Games —hobeturiko jokoak— lehiaketa antolatzen dabil, antiwoke enpresen alde ari den 1789 Kapital izeneko diru-fondoa erabiliz. Kirolariek substantzia kimiko debekatuak irensten ahalko dituzte performantzia sinestezinenak erdiesteko. Datorren abenduan edo estreinatuko den zeingehiagoka horretan parte hartuko dutenek, gainera, dopin kontrolei ihes egitea lortzen badute prima edo dirutza polita eskuratuko dute.
