Autozerbitzua. Negozio borobila. Horko neska harekin esposatu nahi badut, bahitzea aski; ez, barka, aski ez: bortxatu ere egin dezaket. Adin ttikikoa bada ere, lasai. Hogeita lau orenez gutienik abusatu dezaket hartaz, elearen bi adieretan: sexu-abusua eta dibertitu. Ondotik, mila puskatan hautsi dudan ontzia enea bilakatuko da sekulako, aldi honetan, gainera, legez: ezkontza-konpontzailea dela medio. Filippo Melodia siziliar mafiosoa entseatu zen horren egiten Viola Francarekilan. Protokoloa ongi betetzen hasi zen: bortxaz eraman baitzuen eta hartaz abusatu, gainera, partekatu egin zuen lagun taldearekin.
Biktima bera izan zitekeen aditzaren etimologiaren parte, baina ez, ez dio Violak eman izena violare-ri. Kuraiaz beterik, aitzi egin zion borreroa salbatzeari; bortxatzailearen ohorea garbitzeari: auzitaratu baitzuen, harekin esposatzea ukatuz. Viola izen zikindua publiko egiteaz ez zen lotsatu (hau ere bere bi adieretan: beldurtu eta ahalketu). Sinesgaitza da Italiak 1981a arte legez hori praktikatu izana. Are, Frantziak duela 30 urte tanko indargabetu zuela.
