Ikerketa askok berresten dute osasunaren funtsezko zutabea Oinarrizko Osasun Laguntza dela. Ongi funtzionatzen badu, larrialdietako zerbitzuek eta zentro espezializatuetako itxaron-zerrendek behera egin dute.
Horregatik, beharrezkoa da erabiltzaileak osasun-zentroetara eroso iristea, behar duten profesionalarekin ahalik eta denbora laburrenean hitzordua lortzeko. Beharrezkoa da urteetan zehar paziente bakoitzaren eta bere profesionalen arteko jarraipenari eustea, besteak beste, osasun-langileekiko konfiantza etengabea eta jarraitua izan dadin. Alde batera utzi gabe osasunaren arloko sustapena, prebentzioa eta heziketa, eta osasun-arloko desberdintasun sozialak murrizteko behar soziosanitarioak estaliko dituena.
Gure osasun-sistema publikoaren gabezia kronikoek, konpondu beharrean, denboran irauten dute eta oporraldietan areagotu egiten dira. Jakina da udara iristean ordezkapenak betetzeko arazoak daudela, eta horiek larriagotu egiten direla erretiroekin eta aldi baterako ezintasunekin, gehienak betetzen ez direlako, eta, gainera, ospitaleetako oheen kopurua ere gutxitu egiten dela.
Deus berririk ez, urteak aurrera doaz, arazo berberak datoz eta beti aitzakia bera: profesionalen falta. Legegintzaldiko bederatzi hilabeteren ondoren, ez dugu ikusten asistentzia-eredua aldatzeko urrats erabakigarririk, Oinarrizko Osasun Laguntza sendotzeko eta herritarrei ematen zaien zerbitzua hobetzeko. Osasun Departamentuak konponbideak bilatu behar ditu eta beharrezko baliabideak martxan jarri.
Egoera kezkagarria da Iruñerrian, eta are larriagoa da landa-eremu batzuetan, ez baitago larrialdi-zerbitzurik, ezta ospitalez kanpoko zerbitzurik ere.
Beharrezkoa da eredua aldatzea, sindikatuekin adostutako eredu bat lortzea, plantilla fidelizatu eta sendotzeko, urteko LEPak bermatzeko, aurrekontu handiagoa konprometitzeko kontratazioetarako (produktibitateetarako izan beharrean) eta Oinarrizko Osasun Laguntzako zerbitzu-zorroa handitzeko.
Sistema zatikatua, pribatizatuagoa eta gutxiengo ekonomiko zein korporatiboen zerbitzura dagoena sustatzen duten aukeren aurrean, herritar guztien zerbitzura egongo den osasun-sistema publikoa nahi dugu, integrala eta publikoa, herritar guztien zerbitzura lan egingo duena, eta profesionalek errekonozimendua eta gogobetetasuna aurkitzeko modukoa.
Nafarroako Gobernuari eta Osasun Departamentuari herritar guztientzako kalitatezko osasun-sistema publiko bat bermatzeko beharrezkoak eta ausartak diren neurriak eskatzen dizkiegu.
Osasun-zentroak eta herritarrak animatzen ditugu kalitatezko osasun publikorako eskubidea aldarrikatzera, ekimen politiko eta sindikal partikularretatik haratago, izan ere, langile faltaren edo profesionalen ustezko lan-gainkargaren aurrean, osasun-sistema publikoari ospea kendu nahi diote, pribatizazioa bultzatuz.
