Aukeratu berri duten Espainiako Gobernuak, Yolanda Diaz Lan ministroa buru duela, agindu digu enpleguaren eta kalitatezko enpleguaren legegintzaldia izango dela. Bada, joan den azaroaren 27an, Telefonica multinazionalak 5.400 lanpostu suntsituko zituela iragarri zuen (azkenean, 4.000 lanpostu izango direla dio). Lanpostu horiek Telefonicak azken urteotan suntsitutako 50.000 lanpostuei gehitu behar zaizkie. Garai batean 77.000 langile izatera iritsi zirenak, gaur egun, eta enplegu-erregulazioko espedientearen ondoren, ez dira 12.000 izatera iritsiko.
Borrokaren bidez lortutako kalitate-baldintzak dituen plantilla bat desegin da, gero eta soldata eta baldintza prekarioagoak dituzten azpikontratazio-kateekin ordezkatzeko. Telefonica-Movistar multinazionala enpresa publikoa izan zen (telekomunikazioen monopolio zaharraren oinordekoa), joan den mendeko 90eko hamarkadan erabat pribatizatu arte. Pribatizazioaren eskutik, kanporatze eta azpikontratazio masiboaren prozesua ere hasi zen. Hiru hamarkada luze horietan, milaka eta milaka lanpostu kendu ziren, enpresako zuzendaritzaren eta CCOO eta UGT sindikatu nagusien artean adostutako Enplegua Erregulatzeko Espedienteen bidez.
Enplegu egonkor eta baldintzadun horiek kanporatzearen bidez ordezkatu ziren pixkanaka, azpikontratazio-kate luze batean, non lan-baldintzen degradazioa gero eta handiagoa den... Telefonicak azpikontrata bat kontratatzen zuen, zeinak beste azpikontrata bat kontratatzen zuen, eta azpikontrata horrek beste azpikontrata bat kontratatzen zuen... eta azpikontrata horrek langile autonomo faltsuak erabiltzen zituen.
Telefonicaren EEEaren justifikazioa da kobrea amaitzeak eta adimen artifizialak enplegua murriztera behartzen dutela, baina errealitatea da soilik matrizearen kalitatezko enplegua murrizten duela. Milaka eta milaka dira azpikontratatutako enpleguek ordezkatzen dituzten zuzeneko enpleguak. Horietako asko erdi esklabo daude, eta bihar gehiago eta baldintza okerragoetan izango dira, Telefonicak beste kaleratze kolektibo bat aurrera eramatea lortzen badu.
Engainatu egin nahi gaituzte; telekomunikazioek, gaur egun, duela 30 urte baino askoz enplegu gehiago behar dute, orduan telefono finkoa eta faxa besterik ez genuen.
Zoritxarrez, multinazionalak hamarkada hauetan enplegua eta prekaritatea suntsitzeko egin duen politika horrek bi fronte laguntzaile behar izan ditu: sindikala eta gobernukoa.
UGTk eta CCOOk sektoreko prekarizazio-prozesu hori ahalbidetu dute, eta hainbat akordio lortu dituzte kaleratze kolektiboak egiteko. Kaleratze horiek kalitatezko 50.000 lanpostu baino gehiago suntsitu dituzte, azpikontratekiko jarduera propioak etengabe kanporatzeari uko eginez. Nola uler daiteke 50.000 lanpostu suntsitzea eta sindikatu horiek erantzunik ez antolatzea?
Gobernuak ere erantzule dira, laurogeita hamarreko hamarkadan enpresa erabat pribatizatzeagatik; justifikazio ekonomiko faltsuarekin egindako kaleratze kolektiboetako bat bera ere ez geldiarazteagatik, Telefonica urtez urte etekin aberatsak dituen enpresa baita; eta azpikontratazioa legez mugatu ez izanagatik.
Izan ere, azken Lan Erreforman bazegoen konpromisoa, gobernuak, Yolanda Diaz Lan ministroa buru zuela, bete ez zuena, azpikontratazioa ahalik eta gehien mugatzeko eta enpresa azpikontratistak zerbitzuak ematen dituzten enpresa nagusiaren lan- eta ekonomia-baldintza berberak izatera behartzeko.
Telefonicak ehun urte beteko ditu datorren urtean. Kapital publikoarekin sortu, pribatizatu eta kalitatezko enplegua suntsitzeko bide sozialki lotsagabea egin duen enpresa da. Horrela jarraituz gero, Telefonicako langileek ez dute 110. urteurrena beteko.
Horregatik:
- Telefonicari EEEa kentzeko eta kontratazio-plan bat hitzartzeko eskatzen diogu, azpikontratatuta dagoen sektoreari lehentasuna emanez.
- CCOOri eta UGTri eskatzen diegu kalitatezko enplegua defendatzeko, prekaritatearen aurka borrokatzeko, eta, ondorioz, Telefonican ez sinatzeko ez nahitaezko ez borondatezko enplegu-erregulazioko espedienterik.
- Lan-agintaritzari eskatzen diogu Telefoonicak aurkeztutako enplegu-erregulazioko espedientea administratiboki atzera botatzeko, erabat justifikatuta ez dagoelako.
- Espainiako Gobernuari eskatzen diogu gaitzetsi dezala publikoki kaleratze kolektibo hori, eta hitza bete dezala Langileen Estatutuaren 42.1 artikulua lehenbailehen erreformatuz, azpikontratazioa ahalik eta gehien mugatuz, eta enpresa azpikontratistak behartu ditzala zerbitzuak ematen dituzten enpresa nagusiaren lan- eta ekonomia-baldintza berberak izatera. Stop azpikontratazioa.
Espero dugu gizartea sumintzea. Telefonica-Movistarren kaleratze kolektiboa justifikaziorik gabea da eta lotsagarria.
