GOe izeneko oroigarri bat

Manteoko Basque Culinary Centerren proiektuari buruz egin diren analisi eta balioespen desberdinei, uste dut beharrezkoa dela tramitazioa nola egin den azaltzen duen denbora-lerroa gehitzea, hiria postal edo oroigarri gisa, negozio-lerro baten produktu gisa, ulertzen dutenen ospe handiagorako eraikin bat egitea ahalbidetuko duena. Horretan aritu baita EAJ bere bazkidearekin, PSErekin, urte hauetan. Gure hiria, Donostia, lukurari gutxi batzuen esku dagoen negozio bihurtzen.

Horrela ulertzen da Basque Culinary Centerrek Donostiako Udalean Manteoko lursaila lagatzeko eskaera 2021eko uztailaren 23an egin, eta bi asteren buruan izapidetzea onartzea. A priori erakunde publikoaren eta unibertsitate pribatu baten artean sortutako zerbait dirudi ia. Alfonbra gorria, sarreran bertan.

Hasiera-hasieratik, batzuek, zer zetorren ikusita, lehen alarmak piztu genituen. 2021eko irailean, alkateari batzordean planteatu genion ezinezkoa zela lursaila lagatzea, Gros auzoan oraindik irauten duen berdegune bakarra galtzea zekarrelako, eta, gainera, argi zegoelako ez ziela interes publikoari erantzuten, ezta auzoaren beharrei ere. Alkateak lasaitasunera eta sailetako txostenen zain egotera deitu gintuen. Hala ere, haiek neurrira egindako plan berezi bat izapidetzen eta aurrera ateratzen jardun zuten, eraikin berri bat egiteko, zeinak unibertsitate pribatu elitista batez gain —gehiengo sozialarentzat ezin ordainduzkoa izango dena—, jatetxe bat ere izango baitu, bere terrazatxo eta guzti, unibertsitate horren diru-sarrerak gizentzeko. Eta gero esaten dute «irabazi asmorik gabekoa» dela.

Eta plan berezi horren onarpenean beti esan genuen ezetz. Ez, erabilera pribatiborako lurzati publiko bat oparitzeari, auzoari bizkarra ematen diona eta auzoaren beharrizanei jaramonik egiten ez diena, hiria murgilduta dagoen larrialdi klimatikoa txantxetan hartzeaz gain. Esango dute zuhaitzen %80 birlandatuko dituztela, baina zer gertatzen da gaur egungo zuhaitzen itxurarekin? Zenbat urte beharko dira gaur egungoen lan bera egiteko, hau da, auzoari arnasa hartzea errazteko? Are gehiago, ausartzen naiz esatera ezinezkoa izango dela auzoak arnasa hartzea ingurua are gehiago itotzen duen eraikin mamotreto bat sartzen duzunean. Ez dezagun ahaztu Gros Donostiako auzorik trinkoena dela, eta bere dentsitate-maila munduko bigarren hiririk trinkoenaren parean dagoela.

Hala ere, eta EAJren eta PSEren arteko gobernuaren arrabolari esker, aurrera egiten jarraitu zuten. Eta hala egin dute, udal-sailek lursaila lagatzeari buruz egindako txostenek honakoa dioten arren: «Beste edozein jarduketa egin aurretik, beharrezkoa da lurzatia eskatutako erabilerarako erabiltzeko aukera aztertzea». Ohartarazpenei entzungor egin zieten, lursaila bi urtez giltzapean lagatzeko espedientea ezkutatu zuten, eta orain, proposamenaren interes publikoa baloratu arte inoiz abiarazi behar ez zen plan berezi bat izapidetu zutela ikusi dugu.

Uda honetan berriz ere abuztua egin zuten, eta Goiak agindutako oparia eman egin zuen: partzela bat doan 75 urtean, eta erakunde publikoen aldetik 25 milioi euroko diruztatzea.