Euskara ez dago errentan, instituzioen ordua da

Ueman euskaraz gara. Euskararen egoera udalerri euskaldunetan salbuespenekoa da, ordea. Ikuspegia Euskal Herri osora zabalduta, ez dut aparteko berria emango euskara egoera larrian dela esanda. Euskaldunok sobera jakitun gara horretaz. Egoera okerragoa izan zitekeen, bai noski. Egiazki, gure hizkuntza ataka zailagoan egona da, hori ere guztiok dakigu. Eta, horretan, hausnarketa autokonplazienteak egin dituenarentzat nahikoa da gaur atzo baino hobeto gaudela jakitea. Baina euskara hizkuntza normalizatu gisa ikusi nahi dugunok, euskara sustatzeko zein urrats eman beharko liratekeen galdetzen diogu etengabe geure buruari.

Europako hizkuntzarik zaharrena mehatxu eta oztopoz betetako ingurune batean bizitzera kondenatu dute. Horrela, etxeko sukaldean babestu, eta belaunaldiz belaunaldi etenik gabe gauzatutako transmisioa izan da gure hizkuntzak bizirik irauteko aurkitu duen sekretu nagusia. Eta, gaur egun, hizkuntza minorizatu honek gure jendartean leku bat aurkitu badu, esan daiteke hori euskaltzale askok erakutsitako konpromisoari, eta oro har, euskalgintzak egindako lan nekaezinari esker izan dela.

Euskalgintzaren lan eraginkorra zalantzan ipini gabe,Ueman argi daukagu instituzio eta erakunde publikoen ordua dela. Euskal jendarteak ezin du onartu administrazioek beren egitekoak bete gabe dituzten bitartean, euskararen etorkizunaren zama euskalgintzako eragileen gainean pausatzea. Finean, euskal herritarrek eta euskarak dituzten beharrei erantzutea erakunde publikoei dagokie. Eta administrazioek ardura hori bere egiten duten une berean hasiko da benetan euskara hizkuntza normalizatu bilakatzeko bidea.

Uemak hogei urte baino gehiago daramatza lur gune euskaldunetako instituzio publiko eta erakundeetan euskararen erabilera sustatzen. Hizkuntz politika ausart eta aurrerakoiak abian jarriz, euskararen arnas gune diren horiek babestea izan du xede. Halaber, modu zabalago batean, urratsak egin ditu lurralde mailako zein autonomia erkidegoetako erakundeek ere udalekin zein herritarrekin euskaraz funtziona dezaten.

Errenta aitorpena egiteko tramitazioari lotzen bagatzaizkio, Uemak ahaleginak egin ditu euskarari bidea errazteko. Gaur da eguna hego Euskal Herriko administrazio publiko guztiek, ofizialki behintzat, errenta aitorpena euskaraz egiteko aukera eskaintzen dutena. Besterik da praktikan eskubide hori bermatuko duten. Argi dagoena zera da: administrazioek errenta aitorpena euskaraz egiteko aukera zabaldu duten heinean, gero eta gehiago direla berau euskaraz egin duten herritarrak. Horiek hala, Euskal Herriko instituzio publiko guztiei exijitu nahi diegu, herritarren hizkuntz eskubideak errespetatu, eta praktikan errenta aitorpena euskaraz egiteko bitartekoak jar ditzaten.

Bide batez, euskal herritarrak aukera hori baliatu eta errenta aitorpena euskaraz egitera gonbidatu nahi ditugu. Euskararen aldeko jarrera aktiboa hartu eta norbanakoen hizkuntz eskubideak urratzen diren kasuetan salaketa ipiniaz. Norbaitek zalantzarik balu, Uemak modalitate bakoitzean aitorpena euskaraz egiteko moduei buruzko informazioa jarri du bere webgunean (www.uema.org ), bai eta aitorpenean ageri diren hitzen hiztegia ere. Eman diezaiogun, bada, arnasa euskarari.