Horrela hasten da A las barricadas himno anarkosindikalistaren lehen paragrafoa. Joan den mendeko 30eko hamarkadan konposatu bazuten ere, letrak zalantzarik gabeko gaurkotasuna du, gaur egun, iraganean bezala, ekaitz beltzek aireak inarrosten baitituzte.
Gaur, Europar Batasuna, gero eta eskuin-muturrerago jota, atzentzen ari da giza eskubideen defentsa, bakea bilatzea eta esparru sozial eta ekologista minimoki aurrerakoia eratzea dakarren oro. Joan den otsailean, Europar Batzordeak malgutu zituen, aunitz, enpresei galdegiten zizkieten neurriak, haien ekoizpena eta negozioak giza eskubideak errespetatzeko oinarrizko eskakizunei dagokienez. Horrekin batera, ikatza erregai gisa gutxiago erabiltzean ere atzera egin zuen, eta energia atomikoaren sortzeari bultzada emateko posibilitatea handitu zuen. Halaber, erabaki dute erregularizatu gabeko etorkinen kanporatzea prozedura arinagoez eta bizkorragoez egitea.
Aurrekoa gutxi izan balitz bezala, eta honetaz hitz egin nahi dugu, EBk, aho batez (estatu espainiarra barne), erabaki du Europa fermuki berrarmatzea. Emandako arrazoia da arriskuan bizi garela, ustezko mehatxu errusiarra dela kausa. Horrela onetsi dute gastu militarra 800.000 milioi euro handitzea. Horietarik 150.000 batasunaren aurrekontuaren kargura izanen dira eta gainerakoak, 650.000 euro, estatu kideek paratuko dituzte. Finean, Pedro Sanchezek NATOri konprometitutako barne produktu gordinaren (BPG) %2ko gastu militarrari %1,5 gehiago erantsi beharko zaio, osotara BPGaren %3,5 eginen duelarik. Pecata minuta.
Estatu espainiarrean, 2002an, hezkuntza eta sanitatearen gastuek BPGaren %4,71 eta %6,8 egin zuten, hurrenez hurren. Hau da, hemendik lau urtera BPGaren %3,5 hori erdiesten denean, gastu militarrari emanen diogu Hezkuntzari bideratutako aurrekontuaren %75 eta Osasunari bideratutakoaren %50 inguru. Horrela, militarrek eta industria militarrak gerra politika honi esku-zarta ederrak jotzen dizkioten bitartean, irakaskuntza eta osasungintza pagaburu izanen dira, eta ikasgeletan ratioak eta osasun zentroetan itxarote-zerrendak handitzen ikusiko dituzte.
Defentsa Ministerioaren Ikerketa Estrategikoen Institutuaren arabera, Europak, dagoeneko, 1,97 milioi soldadu ditu osotara. Munduko bigarren indar militarra da, Txinaren gibeletik, eta lehendabizikoa tropen profesionalizazio mailari dagokionez. Munduko rankingean lehen postuan dago tanke eta blindatu, urpeko ontzi eta fragata kopuruaren jabetzari dagokionez eta bigarrenean aire-botereari dagokionez. Hori erranda, zer dela eta Europako arma eta botere militarra funtsezko eran areagotzea, mehatxu errusiarrari aurre egiteko?
Bertze aldetik, gastu militarrean BPGaren %3,5 hori erdiesteko, hiru aukera daude, ez bertzerik. Lehendabizikoa, zorpetzea, eta horrek ekarriko du, hurrengo urteetan, aurrekontu publikoek kreditu horien eta bere korrituen amortizazioari aurre egin behar izatea. Bigarrena, diru-sarrera publikoak emendatzea, zergak igoz. Kasu horretan, litekeena da BEZ eta PFEZ izatea gehien handituko direnak (hots, diru-sarrera txikienak dituen populazioaren gehiengoan eragina dutenak) eta ez sozietate edo ondare zergak (hau da, enpresa onurak eta dirudunen jabetzak zergapetzen dituztenak).
Gastu militarraren areagotzea estaltzeko hirugarren modua da aurrekontuetako bertze kontu-sailak murriztea. Hori da, hain zuzen, Rodriguez Zapateroren gobernuak (tenore hartan «Espainiako historiaren aurrerakoiena» deitutakoa ere) egin zuena, 2008ko bankuen eta eraikuntzaren krisiari aurre egiteko: urte batez pentsioak izoztea, funtzionarioen soldatak %5 murriztea, erretreta adina progresiboki 67 urte arte luzatzea... Bada, hartuko al du Sanchezen gobernuak antzeko erabakia? Noski, haren guztiaren prezio politikoa izan zen PPri ateak irekitzea, ondoren hauteskundeak gehiengo absolutuaz irabaz zitzan eta hortik etorri zen atzerakada demokratiko eta sozial orokortua: lan erreforma, pentsioen erreforma, moxal legea... Lehengo lepotik burua?
Botere politiko eta ekonomikoak ezinbertzekoa du arerio faltsuak sortzea haren berezko erantzukizunak hobeki estaltzeko eta haren mezuak justifikatzeko, murrizketa demokratiko eta sozialak onartzeko dei eginez. «Denok bat terrorismoaren kontra!» erraten digute, haien Estatu krimenak blindatzeko harresiak sortzen dituzten bitartean. «COVIDaren aurka bat egin dezagun!», adierazten dute, farmazia-industriak beren mozkinak ugaritzen eta mota guztietako politikariek komisioak erruz txirimizkatzen uzten duten bitartean. «Errusiak gure bizitza mehatxatzen du!», marru egiten dute orain neurri gabe, Mendebaldea denean azken mende eta hamarkadetan herri gehien inbaditu eta gaur gerra eta genozidioak nonahi (Afrika, Palestina...) elikatzen dituena.
Enpresarien goi kargudunek (CEOE, Confebask...) Europako berrarmatzea txalotzen dute gaur. Bere aldetik, klase politikoaren gehiengoak olatuarena egiten die eta gerra industria pozari eutsi ezinik dago. Karl Liebknecht iraultzaile antimilitarista alemaniarrak (Lehen Mundu Gerraren aurkakoa eta bere estatuko militarrek 1919an eraila) adierazi zuen: «Herri bakoitzaren etsaia bere lurraldean berean dago». Urte batzuk geroago, Bertolt Brecht herrikideak gauza bera errepikatu zuen Bigarren Mundu Gerrari buruz: «Etsaiaz mintzo zaizuna, hura bera da etsaia».
Hamarkadetan, 2024a izan da urterik onena Ibex 35eko xintximariendako: Banco Santander, 12.574 milioi euro mozkin; BBVA, 10.034 milioi; Caixa Bank, 5.787 milioi; Iberdrola, 5.612 milioi... Horiek dira, ez bertze, gaur aireak inarrosten dituzten ekaitz beltzak! Utziozu, bada, Errusiara begiratzeari eta ez begirik kendu banda horri! Ez fabrikatu ez tankerik, ezta bonbarik ere, barrikadak baizik, haien gehiegikeriei aurre egiteko!
