Donostia arriskuan

Aspaldi honetan, Donostian gai sozialak lantzen ditugun eragile sozial, sindikal eta politikoak gero eta kezkatuago gaude EAJren eskutik nagusitzen ari den hiri ereduarekin. Kezka horren harira kokatu behar da datorren larunbatean, ekainaren 18an, egingo dugun mobilizazio bateratua. Izan ere, Donostian, Europako Kultur Hiriburua izan zenetik gaurdaino, izugarri indartu dira herritarron bizi baldintzak okertzen dituzten dinamika ekonomiko, kultural, ekologiko, linguistiko zein politikoak, hala nola gentrifikazioa, turistifikazioa, higiezinen espekulazioa, erdalduntzea, askatasun demokratikoen murrizketa...

Mobilizaziora deitzeko unean, aipamen berezia izan du etxebizitzaren larrialdi egoerak, Donostian oinarrizkoa den eskubide sozial bat, etxebizitzarena, gero eta gehiago urratzen delako. Gure hiria historikoki Estatuko hiri garestienetarikoa izanik ere, Eneko Goiak zuzendu dituen azken bi agintaldietan, egoera larriagotu baino ez da egin. Etxebizitzaren prezioa, bai salmentan eta baita alokairuan ere, izugarri igo da, donostiar asko etxetik nahiz Donostiatik botatzeraino.

Hori guztia nahikoa ez, eta azken urte hauetan funts putreei eta multinazional turistikoei ez zaie oztoporik jarri etxebizitzarekin espekulatzeko. Egoera horren inpaktua inguruko herrietara ere zabaltzen ari da, hala nola Astigarragara, Hernanira, Usurbilera... Gazteek, langile prekarioek, migranteek ez dute etxebizitza izateko aukerarik Donostian. Eliteek, aldiz, bai, horretarako ondare historikoa txikitu behar badute ere, Arte Ederren eraikinean bezala. Nonahi bizitzeko guztiok omen dugun oinarrizko eskubidea, soilik aberatsena da Donostian.

Oinarrizko eskubideen galera horretan zerikusi handia du EAJk zuzentzen duen turismo eredu masiboak. Donostiaren etorkizuna arriskuan jartzen ari den bidea frenatzeko bitartekoa izan beharrean, udala espekulatzaileen aldeko tresna bihurtu da Eneko Goiaren eskutik. Poliki-poliki, Donostian bizi garen gehienon bizi baldintzak okertzen ari dira eta auzoetako jatorrizko sare sozial guztia desegiten. Parte Zaharraren ildotik doaz beste auzoak ere: Gros, Antigua, Igeldo...

Garai bateko Donostiako merkataritza guztia pikutara doa. Komertzio txikia deuseztatu eta nazioarteko marka komertzial nagusiak jabetzen ari dira Donostiaz. Inditex taldeak Donostiako erdialdean duen presentzia ikustea besterik ez dago. Donostiak Europako beste edozein hiribururen gero eta antz handiagoa du, zer esanik ez metroa izaten dugunean. Sasoi bateko Perla del Cantábrico haren parekoagoa da Donostia: elitista, erdalduna, arrazista, kutsatzailea...

Zorionez, errealitate gordin horren aurrean, gero eta indartsuagoa dadonostiarron kezka, eta baita horri guztiari eman behar diogun protesta sozialaren aldeko nahia ere. BainaDonostiaren eredu kapitalista horibabesten dutenak ez daude prest gure hirian salaketa soziala eta pentsamendu kritikoaindartzen ikusteko. Mila fronte zabaldu dizkigute, borreroaren mila aurpegiak plazaratuz.

Hor kokatu behar dira Donostiako udaletxea udal-itxia bihurtzeko Eneko Goiak hartu dituen neurriak, parte hartzeko bideak itxiz, mozioak aurkezteko aukera mugatuz, plenoak kontrolatzeko bitartekoak ugarituz... Eta, bestetik, Donostiako kaleko protesta soziala eta propaganda politikoa debekatzeko landuriko bideak, hala nola Zibismoaren Udal Ordenantza eta mozal legea. Azken urteotan, ehunka herritar eta jendarte eragile gehienak zigortu dituzte, beraien eskubide sozial, zibil eta politikoak gero eta gehiago murriztuz; besteak beste, Errauskailuaren Aurkako Mugimendua, Mugimendu Feminista, Euskal Preso Politikoen Aldeko Mugimendua, Alde Zaharreko Gazte Asanblada, Ernai, GKS, Itaia, Ikasle Abertzaleak, Jardun, ELA, LAB, Piztu Donostia, Mugimendu Antifaxista...

Gauzak horrela, Piztu Donostia plataformatik argi eta garbi azaldu nahi dugu EAJren eskutik bideratzen ari den Donostiaren hiri eredua eta Donostiako Udalean Eneko Goiak bideratzen duen gobernantza txanpon beraren bi aldeak direla, arazo bakarraren bi osagarriak.

Zerrendatutako Donostiako arazo guztien jatorrian aliantza boteretsu bat dago. Bertako eta kanpoko inbertsiogileek, espekulatzaileek eta haien esanetara jarduten duten arduradun politiko zein hedabide handiek osaturikoa benetako amarauna da. Horiek guztiek etekin ekonomiko erraldoia ateratzen diote Donostiari norabide hori emanez eta horrela gobernatuz, donostiar gehienon bizitzaren duintasunaren kaltetan. Boteredun gutxi batzuen arteko sare boteretsua da hiriaren proiektu estrategikoa, agenda publikoa eta gobernantza kontrolatzen dituena, donostiar gehienon kaltetan.

Argi dago COVID-19aren pandemia ondoren eliteek prest zituztela,aspalditik, normaltasun berria zaharra baino errentagarriago bihurtzeko neurriak eta planak. Orduan aipatzen genuen herritarronDonostia eraikitzeko aukera da arriskuan dagoena. Donostia herritar, solidario, euskaldun, feminista eta demokratikoaren etorkizuna da hipotekatzen ari direna. Horregatik, gure eskubide sozial, zibil eta politikoen defentsan, Piztu Donostia plataformatik ekainaren 18ko mobilizaziora joateko deia zabaltzen diegu donostiar guztiei. Borrokatuko ez dugun Donostia da galduko dugun bakarra. Mozal hiriari ez! Eta udal-itxiari ez!