Egunkari honen ekainaren 14ko edizioan, Agus Hernanek artikulu bat sinatu du Urkulluk Pradalesi uzten dion patata beroa izenburupean. Laburbilduz esaten du Iñigo Urkullu lehendakariak bizkarra eman diela Estatuaren biktimei.
Desmemoria horrek –ezustekoa edo interesatua– datu egiaztagarriak gogoraraztea besterik ez du merezi.
• 2014-I-13. Eusko Jaurlaritzak, Iñigo Urkullu buru zuela, GALen, BVEren eta antzeko erakunde terroristen biktimei kalte-ordainak ukatzeari buruzko txostena argitaratu zuen.
• 2014-IX-24. Kasuarekin zerikusia duten beste gestioen artean, Eusko Jaurlaritzak, Iñigo Urkullu buru zuela, laguntza ekonomikoa eman zuen Lasa y Zabala filma bultzatzeko.
• 2014-XI-27. Gogora Memoriaren Euskal Institutua sortzeko Legea onartu zen.
• 2014-XII-10. Eusko Jaurlaritzak, Iñigo Urkullu buru zuela, René Cassin Saria eman zien Adi-adian biktima hezitzaileen programan eta Glencree esperientzian parte hartu zuten ETAren, GALen eta poliziaren indarkeriaren 42 biktimari.
• 2016-II-20. Iñigo Urkullu lehendakaria botere-abusuagatik nahiz polizia-indarkeriaren legez kanpoko erabilerarengatiko urraketen biktimei egindako lehen errekonozimendu instituzionalaren buru izan zen. Bere hitzaldia hemen berreskura daiteke: https://www.irekia.euskadi.eus/uploads/attachments/7690/Discurso_LHDK_acto_reconocimiento_victimas_20-02-2016.pdf?1456311507
• 2016-II-20. Eusko Jaurlaritzak, Iñigo Urkullu buru zuela, Giza Eskubideen Urraketen Balorazio Batzordearen 1960-1978 txostena aurkeztu zuen.
• 2016-VII-28. Eusko Jaurlaritzak, Iñigo Urkullu buru zuela, 12/2016 Legea onartu zuen, Estatuko indarkeriaren biktimak aitortzeko eta erreparatzeko.
• 2017-IV-24. Eusko Jaurlaritzak, Iñigo Urkullu buru zuela, 12/2016 Biktimen Legea eta Giza Eskubideen Nazioarteko Zuzenbidea jardunaldia antolatu zuen, Fabian Salvioli Nazio Batuen Giza Eskubideen Batzordeko presidentearen (2015-16) parte-hartzearekin.
• 2017-VI-26. Legearen babesean sortutako Balorazio Batzordea lehendakariarekin bildu zen eta Ahanzturatik ateratzen txostena aurkeztu zen.
• 2017-XII-18. Eusko Jaurlaritzak, Iñigo Urkullu buru zuela, tortura eta tratu txarrak ikertzeko proiektua aurkeztu zuen (1960 eta 2014). Txosten aitzindaria nazioartean.
• 2019-XI-19. Eusko Jaurlaritzak, Iñigo Urkullu buru zuela, 80.000 euroko dirulaguntza onartu zuen Egiari Zor elkartearentzat, Espainiako Gobernuak dirulaguntza jasotzeko eskubidea ukatu zien biktimei laguntza emateko.
• 2020-I-20. Alonsotegiko Aldana tabernako atentatuaren 40. urteurreneko ekitaldian izan zen lehendakaria.
• 2020-IV-21. Eusko Jaurlaritzak, Iñigo Urkullu buru zuela, eskuin muturreko erakunde terroristen biktimei buruzko txostena argitaratu zuen (1975 eta 1978).
• 2020-XII-9. Eusko Jaurlaritzak, Iñigo Urkullu buru zuela, 100.000 euroko bigarren dirulaguntza onartu zuen Egiari Zor elkartearentzat.
• 2021-VI-26. Eusko Jaurlaritzak, Iñigo Urkullu buru zuela, 35 biktima aitortzeko ekitaldia antolatu zuen, Torturaren Biktimen Nazioarteko Egunarekin bat eginez.
• 2022-II-27. Eusko Jaurlaritzak, Iñigo Urkullu buru zuela, biktima izaera aitortu zion Mikel Zabalzari Orbaizetan egindako ekitaldi batean. Bertan, «justizia» exijitu eta «erantzukizuna» bere gain hartzeko eskatu zion Estatuari.
• 2022-XII-15. Memoria Eraikiz: GAL 1983 dokumentalaren proiekzioa eta GALen eta ETAren biktimekin solasaldia, Gogora Institutuak antolatua.
• 2023-X-31. Eusko Jaurlaritzak, Iñigo Urkullu buru zuela, euskal legeak babestutako Estatuaren biktimak aitortzeko ekitaldia antolatu zuen.
• 2024-II-15. Eusko Jaurlaritzak, Iñigo Urkullu buru zuela, martxoaren 3ko Fundazioaren eraketa sinatu zuen. Biktimen elkarteak patronatuko kide izango dira.
• Orain arte, Iñigo Urkullu buru duen Eusko Jaurlaritzak Estatuaren indarkeriarekin edo eskuin muturreko terrorismoarekin edo parapolizialarekin lotutako 334 biktima aitortu ditu.
Aurreko zerrenda lagin bat baino ez da. Askoz adibide gehiago daude. Jarduera diskretuak Aranzadirekin, Gogora Institutuaren dozenaka ekimen, zuzeneko gestioak Espainiako Gobernuaren aurrean edo Kongresuko Euskal Taldearen bitartez, kasu espezifikoei buruzko txostenak edo ekitaldiak, indarkeria-mota horren dozenaka biktimari laguntzeko gestioak, edo arrazoi humanitarioengatik edo bidegabekeriagatik presoei eta haien familiei laguntzeko gestioak. Aranzadi, Harrera, Etxerat eta Sare erakundeek, besteak beste, adibide horien fede eman dezakete (Ikus Karlos Ioldiri joan den ekainaren 4an Gara egunkarian egindako elkarrizketa).
Iñigo Urkullu lehendakaria buru duen Eusko Jaurlaritzak hiru legegintzaldi hauetan indarkeria horren biktimekiko erakutsi duen sentsibilitatearen erakusgarri da. Agus Hernanen artikuluak, besterik gabe, errealitate hori ahaztu egiten du modu ulertezinean.
Bide batez, artikuluak ETAren armagabetze- eta desegite-prozesuak aipatzen ditu. Era berean, ahaztu egiten du Jonathan Powellen Dialogue Advisory Group (DAG) edo Ram Manikkaligamen Nazioarteko Egiaztatze Batzordea bezalako nazioarteko erakundeek eutsi egin ziotela prozesu horietan zuten zereginari –beraiek adierazi zuten bezala– Eusko Jaurlaritzak, Iñigo Urkulluren gidaritzapean, hamaika oztopori aurre eginez eskaini zien eta mantendu zuen laguntza instituzionalagatik. Izan ere, horixe izan zen bere babes instituzional bakarra.
