Abortatzeko eskubidea borroka feminista erabakigarria da, gure gorputz-autonomia murrizten saiatzen diren indar kontserbadoreek etengabe mehatxatzen dutena. Herrialde bateko atzerakada bakoitzak mundu mailako mugimendu atzerakoiak elikatzen ditu. Gure eskubideei erasotzen dietenean, gure askatasuna, duintasuna eta osasuna daude jokoan.
Frantzian, abortatzeko eskubidea babestu arren, ahots kontserbadoreak sarrera hori mugatzen saiatzen dira aldian-aldian, medikuen kontzientzia-eragozpena goraipatuz edo desinformazio-kanpainak eginez. Diskurtso horiek, alderdi batzuek hedatuak, emazteen gorputzaren ikuspegi patriarkala inposatu nahi dute. Baina GEIrako dugun eskubidea aspaldiko borroka feministen emaitza da. 1975ean, Simone Veil eta emazteen mobilizazioari esker, GEIren lege despenalizatzailea bozkatu zen. Hala ere, garaipen hori beti dago arriskuan, eta hori defendatzen jarraitu behar dugu.
2024ko martxoan, GEIra jotzeko askatasuna Frantziako Konstituzioan inskribatzea urrats sinboliko garrantzitsua da, baina ez du eskubide ukaezin bat bermatzen.
Pertsona bat nahi gabeko haurdunaldian jarraitzera behartzea indarkeria sistemikoa da. GEIren debekuak emazteak aterabide arriskutsuak erabiltzera bultzatzen ditu: bederatzi minutuz behin emazte bat hiltzen da abortu klandestino baten ondorioz munduan. Horrek amaitu behar du.
Nazioartean, atzerapausoak ikaragarriak dira. Europan, funtsezko mugimendu erreakzionarioek abortua baldintzarik gabe eskuratzeko eskubidea atzerarazten dute (Italia, Polonia...). Estatu Batuetan, Auzitegi Gorenaren erabakiak hemezortzi estatutan debekatu zuen GEI. Texasen, lege oso murriztaile batek %56ko igoera eragin zuen amaren heriotza-tasan 2019 eta 2022 bitartean (Gender Equity Policy Institute ikerketa), estatu mailan %11ko igoerarekin alderatuta. Eraso horiek, emazteen bizia arriskuan jartzeaz gain, LGBTQI+ pertsonen, migratzaileen eta gutxiengoen eskubideak ere arriskuan jartzen dituzte.
Gure eskubide erreproduktibo eta askatasunen aurkako eraso global hau mugimendu kontserbadoreek egiten dute, askotan sare erlijiosoen laguntzarekin. Emazteek beren gorputzaren gaineko kontrolik ez zuten garai batera eraman nahi gaituzte. Baina ez dugu amore eman nahi.
Feministok mundu osoan mobilizatzen jarraitu behar dugu. Abortatzeko eskubidea funtsezkoa da gure askatasunerako. Sarbide hori murrizteak desberdintasunak areagotu eta bizitzak arriskuan jarri besterik ez du egiten. Justizia erreproduktiboaren aldeko borroka mundiala da, eta hori garaipeneraino eramateko prest gaude.
