Erraustegiaren Aurkako Mugimenduak egin du ohartarazpena, eta sare sozialetan jarri dituzten irudiek berresten dute: Zubietako erraustegiaren ondoko Arkaitz erreka kutsatuta dago. Irudietan ikusten denez, errekako ura zikin dago, eta aparra ere badauka zenbait lekutan.
Salaketa irmoa egin dute mugimenduko kideek: «Berriro ere, Zubietako erraustegi kriminalaren ondoko Arkaitz erreka kutsatuta dago». Haien esanetan, «oso larria» da gertatzen ari dena: «Zenbait ordu igaro ostean, kutsadurak erraustegitik ateratzen jarraitzen du, etenik gabe». «Agintariak isilik» daudela ere salatu dute, eta, hori ikusirik, eskatu dute herritarrei informazioa emateko.
Uraren Euskal Agentziaren jarrera ere deitoratu dute. Azaldu dutenez, zubietar batek deitu behar izan die arduradunei. Orduan, Uraren Euskal Agentziako kideak bertaratu dira, baina, mugimenduko kideen esanetan, ez dute laginak hartzeko asmorik agertu. Ordea, taldeko partaide batek esan die beraiek laginak hartuko zituztela: «Orduan esan dute: 'Zuek ikertuko baduzue, guk ere bai'. Eta horregatik hartu dute bestela hartuko ez zuten lagina».
