Arabako Foru Aldundiak Natura 2000 sareko zortzi ibai eremu lehengoratuko ditu, ohar bidez jakinarazi duenez. Erakundeak azaldu du ibai horien bazterretan berezko landare espezieak ezartzeko lanak kontratatuko dituela. 96.700 euroko aurrekontua gorde du horretarako. Europako Batasunak finantzatuko du kopuru horren %40. Helburua da narriatuta dauden eremuen kontserbazioa hobetzea berezko flora landatuta.
Aldundiak esku hartuko du Ebro, Zadorra, Baia, Ihuda, Barrundia, Ega-Berron, Arakil eta Omecillo-Tumecillo ibaien kontserbazio bereziko eremuetan. Gune horietan lizarrak, haltzak eta sahatsak landatuko dituzte, baita berezko beste zuhaitz eta zuhaixka espezie batzuk ere. Horrez gain, habitat horietan dauden espezieen egoera hobetu nahi du. Besteak beste, lizarrarena, binorriarena, elorri beltzarena, elorri zuriarena, zuhandorrarena eta astigarrarena. Foru gobernuaren esanetan, lanek zazpi hilabete iraungo dute.
Natura 2000 Europako Batasunaren ingurumen eremu babestuen sarea da. Balio ekologiko handiko naturaguneak eta mehatxatutako espezieak eta habitatak hartzen ditu, horiek egoera onean kontserbatzeko helburuz. Araban, sareak babestutako eremuak lurralde azaleraren %28 hartzen du, eta 29 gune dira haren parte; kontserbazio bereziko eremuak dira horietatik 24, eta hegaztiak babesteko eremu bereziak beste bost.
