Emakume bat leihotik erori zela eta Ziburun atxiloturiko gizona aske utzi dute gaur arratsaldean, Sud Ouest egunkariak aurreratu duenez. Igandean atxilotu zuten gizona, haren bikotekidea Ziburuko hotel bateko leihotik erori ostean. Atxiloketa 24 orduz luzatu zioten atzo, baina gaur arratsaldean Donibane Lohitzuneko komisaria utzi du, Poliziak ez duelako bildu haren kontrako ikerketa judizial bat hasteko nahikoa froga.
Gizonak «aurrekari polizialak» dituela adierazi du Stephanie Veyssiere Baionako prokuradoreordeak. Sud Ouest egunkariak iturri polizial batzuk ere aipatu ditu, eta baieztatu du gizona jadanik «begitan» zutela indarkeria matxistagatik.
Igandean Ziburun (Lapurdi) eraikin batetik erori zen emaztea hil edo biziko egoeran dago oraino. 30 urte inguru ditu, eta zauri larriak ditu, bertzeak bertze gerrialdean. Medikuek koma artifizialean daukate, garuneko kalteetatik babesteko.
