Asteon zabaldu dute albistea: Eusko Jaurlaritzako Hezkuntza Sailak 140.000 euroko isuna jarriko dio Zarauzko ikastolari (Gipuzkoa). Gertatutakoa salatzeko eta Salbatore Mitxelena ikastolari babesa adierazteko, elkarretaratzeak egin dituzte gaur Euskal Herriaren luze-zabaleko zenbait ikastolatan.
Zarauzko ikastolako eta Ikastolen Elkarteko ordezkariek asteartean egin zuten agerraldia, xehetasunak emateko. Bertan, zera adierazi zuten: sailak zortzi familia «kanporatu» nahi izan zituela ikastolatik 2023-2024ko ikasturteko matrikulazioan, baina ikastolako kideek erabaki zutela denei «ateak zabaltzea»; horregatik jarri diete zigorra.
Izan ere, Jaurlaritzak 2023-2024ko ikasturterako matrikulazioan zenbait neurri jarri zituen indarrean; nabarmendu zuten eskola segregazioa apaltzea eta ikasleen banaketa orekatuagoa lortzea zela helburua. Horretarako, zaurgarritasun indize bat ezarri zuten, eta, horren arabera, zenbait kasutan familiak lehenengo aukera gisa eskatu ez zuten ikastetxeetara bidali zituzten. Neurriak oraindik indarrean daude.
Zarauzko auziaren nondik norakoak azaldu ostean, adierazi zuten Hezkuntza Sailak bilera batera deitu zituela, eta «ia aldaketarik onartzen ez zuen proposamen itxi bat» aurkeztu zietela bertan. Nabarmendu zutenez, hori sinatu beste aukerarik ez zuten ikusi. Horren arabera, ikastolak 140.000 euro ordaindu beharko ditu; trukean, zortzi umeak ikastolan matrikulatuko dituzte ofizialki. Zarauzko ikastola sostengatzeko, dirua biltzeko kanpaina abiatu dute.
