Gasteizko Kontseilu Sozialistak jakinarazi duenez, «zaurgarritasun egoeran» dagoen pertsona bat etxegabetu dute. Gasteizko Zaramaga auzoan gertatu da, gaur goizean. Hainbat lagun bildu dira etxebizitzaren aurrean, etxegabetzea eragozteko. Hala ere, Ertzaintza eta Udaltzaingoa oldartu egin zaizkie, eta etxegabetzea aurrera eraman ahal izan dute. Bi pertsona identifikatu dituzte.
Atearen aurrean zeudenen kontra oldartu da polizia.
— Kontseilu Sozialista Gasteiz (@Kontseilua_Gast) October 16, 2023
La policía carga contra los manifestantes. pic.twitter.com/jHImeeNrdb
Kontseilu Sozialistak adierazi du etxegabetu duten pertsonaren deia jaso zutela, bi egunen buruan etxetik botako zutela erranez. Gehitu dute, etxegabetutako pertsona «zaurgarritasun egoeran» dagoela, indarkeria matxistaren biktima izan zelako, eta bertze etxegabetze bat jasan zuelako 2017an. Adierazpen irmo bat ere egin dute: «Etxegabetze guztiak berehala eta baldintzarik gabe etetea aldarrikatzen dugu».
