EH Bilduk Espainiako Senatura eramango du Gasteiz eta Zaragoza (Espainia) arteko tentsio handiko linearen proiektua bertan behera uzteko eskaria. 165 kilometroko linea batekin lotu nahi dituzte Zaragoza probintziako Tauste herriko zortzi parke eoliko eta bi fotovoltaiko Gasteizko Jundiz industrialdearekin.
Koalizio abertzaleak esan du Senatuan eskatuko duela Forestaliaren proiektua bertan behera uzteko, kalte konponezinak eragingo dituelako ingurumenean. Josu Estarrona EH Bilduko senatariak azaldu du gertuko ekoizpen berriztagarria lehenetsi behar dela; haren esanetan, Espainiako Trantsizio Energetikorako eta Erronka Demografikorako Ministerioak baimena eman dio Forestaliari Tausten zortzi parke eoliko eta bi fotovoltaiko egiteko, baita 165 kilometroko ebakuazio linea bat egiteko ere.
