Xabier Perez Aldunate euskal presoa baldintzapean aske geratu da, Etxerat elkarteak jakinarazi duenez. Espainiako Auzitegi Nazionaleko Espetxe Zaintzako Epaitegi Zentralak ebatzi du haren askatasunaren alde.
Perez Aldunate Iruñekoa da, eta hemeretzi urte baino gehiago egin ditu preso. 2005ean espetxeratu zuten, eta hogei urteko espetxe zigorra ezarri. Espainiako kartzeletan egon zen preso, 2020ko azarora arte. Orduan, Kordobako espetxetik Iruñera lekualdatu zuten, eta, gero, Martutenera. 2021eko maiatzean, berriz, bigarren gradua malgutu zioten, 100.2 artikulua aplikatuta, eta, urtarril honetan, hirugarren gradua ezarri zioten. Beraz, etxean ari zen zigorra betetzen.
