Aberri Egunean Gernikara joatera deitu du Jardun koordinakundeak

«Independentziaren eta sozialismoaren alde lerratutako langileak batzeko, mobilizatzeko, kontzientzia hartzeko eta antolatzeko» baliatu nahi du Jardun koordinakundeak aurtengo Aberri Eguna.  Martxoaren 31n Gernikan (Bizkaia) biltzeko deia egin die Euskal Herriko langileei, «etorkizuna eraikitzeko». Borroka bidea, askatasuna ipar izango da aurtengo mezu nagusia.

Egun horretan kalera ateratzeko garrantzia azpimarratu zuten atzo prentsa aurrean egindako agerraldian: «Aberri Eguna ez da ospakizun eguna. Aberri Eguna Euskal Herriak mugei aurre egin eta horiek apurtzeko mailua da. Aberri Eguna isiltasunari eta ukazioari aurre egiten lagundu eta bere izatea eta izana ozen aldarrikatzeko bozgorailua da».

Jardunek nazio izaera ezabatu nahi dutenei aurre egiteko baliatu nahi du Aberri Eguna. «Zapalkuntzak dirauen bitartean, borrokarako borondatea izango du Euskal Herri langileak. Eta borroka horrek dirauen bitartean, Euskal Herria existituko da, gu oso kontziente baikara nazioa izan bagarela eta zergatik garen nazioa».