EAJko Bizkaiko batzarkideak Usansoloko galdeketa "ofizializatzearen alde" daude, eta emaitza "errespetatuko" dute, desanexioari buruzko erreferenduma bultzatzen duen taldeak jakinarazi duenez. Erreferenduma azaroaren 23an egingo du Usansolo Herria plataformak.
Galdeketaren aldeko talde eragileko kideetako bat, Javier Aurre, "ziur" dago Usansolon gehiengoak babestuko duela desanexioa. "Batetik, distantzia geografikoak banantzen ditu Usansolo eta Galdakao; bestetik, eskolak, osasun etxea eta halakoak baditugu, zergatik ez eduki udal propio bat?". Ostegunean Ibon Uribe Galdakaoko alkatearekin biltzeko asmoa dute.
Aurrek onartu du ezen, herritarrek desanexioa hautatu arren, ziurrenik ez dela gauzatuko agintaldia amaitu aurretik, arrazoi burokratikoengatik. Bizkaian 2004an izan zen azken desanexioa: Ziortza-Bolibar Markinatik banandu zen.
