Euskal Hirigune Elkargoko Txik Txak autobus sarean hamahiru milioi bidaiari izan ziren iaz, elkargoko komunikazio zerbitzuak jakinarazi duenez. Aitzineko urteko kopurua baino %9 gehiago da hori, eta 2021ekoa baino %28 gehiago. Azken urteetan izan duen bilakaera goraipatu dute.
Nagusiki Baionako hirigunean eskaintzen du autobus zerbitzua Txik Txak sareak, baina azken urteetan Lapurdiko kostaldeko herrietara eta barnealdera ere iritsi da. Hala, Baiona eta Hendaia (Lapurdi) lotzen dituen lineak 780.000 bidaiari izan zituen 2024. urtean —%6ko emendatzea—. Barnealdeko lineetan 400.000 bidaiari izan dira.
Euskal Elkargoak zerbitzua indartu zuen urtarril hasieran. Moldaketak egin dituzte autobus linea batzuetan, baina autobusen maiztasuna emendatzea izan da berrikuntza nagusia. Horrez gain, eskatu ahalako garraioa ere martxan jarri dute, barnealdean zerbitzua hobetzeko asmoarekin.
