Nafarroako Hezkuntza arloko sindikatuek beste greba egun batera deitu zituzten atzo Nafarroako sare publikoko irakasleak. Iragan ostegunean egin zuten azkena, baina sindikatuek ez dute jarrera aldaketarik sumatu. Nafarroako Gobernuko presidente Maria Txibitek erantzun egin die gaur, eta negoziatzeko prestasuna adierazi. Argi utzi nahi izan du Gobernua beti azaldu dela prest negoziatzeko, eta, hortaz, Carlos Gimeno Hezkuntza kontseilaria ere bai: «Izan ere, azken batzordean sindikatuak izan ziren, hain zuzen, mahaitik altxatu zirenak eta joan zirenak».
Sindikatuek, halaber, Txibiterekin hitz egin nahi dutela eskatu dute, eta ez Carlos Gimeno kontseilariarekin. Presidenteak, ordea, ordainsarien afera gobernuarekin negoziatu behar dela erantzun die, eta «Gimeno gobernua dela» berretsi. «Hezkuntza alorreko politikak Nafarroako Gobernuaren politikak dira; gobernuaren hitzen balio berbera dute kontseilariak esandakoek».
Aniztasuna jomugan
Tuteran eta Fiteron, bestalde, ikasleen aniztasunaren arretan neurriak har ditzala eskatu diote gobernuari, eta Txibitek esan du Gimenok arreta hori hobetzeko proposamen bat duela mahai gainean. «Geroz eta hezkuntza komunitate pluralagoa daukagu, eta, beraz, behar bereziak dituzten ikasle gehiago daudela ere ohartu gara». Halaber, ratioen egoera aztertzen ari direla ere esan du Txibitek: «Ratioak linealki jaistea proposatzen dute sindikatuek, baina hori ez da irtenbiderik egokiena; izan ere, zentro guztiak ez daude egoera berean».
