Txertoen dosien erdiak jarri dituzte Hego Euskal Herrian

GASTEIZ. Eusko Jaurlaritzak COVID-19aren aurka orain arte jasotako 31.500 txertoen dosien erdiak jarri ditu, Gotzone Sagardui Osasun sailburuak azaldutakoaren arabera. Falta direnak datorren astetik aurrera hasiko dira jartzen, jada txertatuta daudenei bigarren dosia jartzeko. Horixe izango da, Modernaren txertoa heldu bitartan, Eusko Jaurlaritzaren txertatze kanpaina, Sagarduik azaldu duenez. Bestetik, atzo jaso zuen Pfizer botika konpainiaren azken txerto sorta Jaurlaritzak; 15.600 dosi gehiago. Erdiak bigarren txertaketarako gordeko dituztela azaldu du Sagarduik, orain arte astero jasotako dosiekin egin bezala. «Paziente bakoitzaren txertaketa zikloa» betetzen dela bermatu nahi dute horrela. Osasun Sailak otsailaren bukaerarako aurreikusi du zahar etxeetako txertaketa kanpainaren amaiera; eta, hori bukatutakoan, osasungintzako langileenarekin hasteko asmoa du. Hala ere, erritmoa bizkortu ahal izango da, Pfizerren txertoaz gain Modernaren txertoa ere ailegatzen bada. Sagarduik jakinarazi du dagoeneko 200 egoitzatako egoiliarrak eta langileak txertatu dituztela.

Nafarroako Gobernuak ere antzeko datuak jakinarazi ditu: txertoen %46,5 ipini dituzte dagoeneko. Herrialdeko txertaketa kanpaina aurreikusitakoaren arabera doala azaldu du gobernuak, «erritmo progresiboan»; eta Nafarroan ere astero jasotako dosien zati bat «erreserba estrategiko» moduan gordeko dutela.