Tuvisako gidariek greba mugagabea egingo dute otsailaren 10etik aurrera, Iñaki Gurtubai Tuvisako zuzendariarekin eta Gasteizko Udalarekin akordioa egitea lortu ezean. Argitu dute hamar langiletik bederatzik bozkatu dutela deialdiaren alde: «Langileen %90 ezin dira oker egon».
Tuvisako langileek herritarrei eskerrak emanez hasi dute prentsaurrekoa, Gasteizko Plaza Berrian. Izan ere, uste dute herritarrak direla azken hilabeteotan egin dituzten lanuzteen ondorioz «kaltetutako lehenak». Hala ere, adierazi dute mobilizazioak direla Tuvisaren kudeaketa «negargarriari» aurre egiteko «modu bakarra».
Udalarekin bost bilera izan dituztela azaldu dute Tuvisako gidariek, eta langileen arazo eta aldarrikapenen berri emateko baliatu dituztela. Iritzi diote aurrerapauso batzuk eman direla, baina ez direla «nahikoa». Are, Gurtubairi eta Maider Etxeberria Gasteizko alkateari leporatu diete zerbitzuan pribatizazioak egitea eta gatazka «artifizialki luzatzea». «Udalak badaki zein den arazoa, eta badakite zein den gatazka amaitzeko irtenbidea», adierazi dute.
Otsailaren 10a baino lehen
Tuvisako langileen ordezkariek azaldu dutenez, bilerei esker aurrerapenak egin dituzte puntu batzuetan. Horregatik, eta «borondate ona» eta gatazka konpontzeko «prestasuna» adierazteko, gidariek bertan behera utziko dituzte otsailaren 10era arteko greba deialdiak. Otsailaren 10ean, baina, greba mugagabea hasiko dute gobernu taldea (PSE-EE eta EAJ) eta Administrazio Kontseilua osatzen duten gainerako alderdiak «gatazka amaitzeko inplikatu» ezean.
«Berriz diogu ez garela dirua eskatzen ari. Zorroztasuna eta osasuna hobetu nahi ditugu. Horretarako, autobus gehiago behar ditugu kalean», azaldu dute. «Ezohikoa» izan arren, ez dute soldata igoerarik eskatu. Bi eskakizun nagusi dituzte: autobusek ibilbidea egiteko denbora gehiago izatea eta udalak ezarritako maiztasunak betetzea.
Horretaz gain, 8/2019 Errege Dekretua betetzea exijitzen dute, enpresak langileen lanorduen erregistroa izatera behartzen dituena. «Ez dituzte zenbatzen gure lanordu guztiak», jakinarazi dute. Baldintza horiek guztiak betetzeko asmoz, Tuvisako langileen batzordeak adierazi du «atsedenik gabe» jarraituko duela lanean, gatazka otsailaren 10a baino lehen amaiarazteko.
