Espainiako Poliziak gaur jakinarazi du atxilo hartu duela 2023aren bukaeran Nafarroan hil zituzten bi laborarien ustezko hiltzailea. Atzo atxilotu zuten gizona, Beziersen (Frantzia). 50 egunean hiru lagun hil izana leporatzen diote: 2023ko azarotik eta 2024ko urtarrilera bitartean hiru gorpu aurkitu zituzten: bat Tuteran, beste bat Ribaforadan (Nafarroa) eta Vilanova de la Barcan (Herrialde Katalanak).
Hildako hirurak nekazariak ziren, eta, Poliziaren ustez, lanean ari zirela egin zieten eraso. Ez dago argi, baina, zergatik eraso zieten; bere garaian, poliziek baztertu egin zuten lapurretaren hipotesia. Hala ere, 2023ko abenduaren 21ean izandako hilketan, Ribaforadan, nekazariaren autoa lapurtu zuen erasotzaileak.
Auto hori Katalunian agertu zen, hango hilketaren harira; hala, ondorioztatu zuten bazitekeela hiru hilketak lotuta egotea.
Operazioak ia urte eta erdi iraun du. Tuterako Lehen Auzialdiko eta Instrukzioko Hirugarren Epaitegia da auziaren arduraduna, eta, oraingoz, sekretupean ezarri du sumarioa.
