Emakume batek desagertuta pasatu du gaua, eta goizean aurkitu dute, onik. Desagertutako haren koinatak 01:15 aldera eman zuen berria. Azaldu zuen arratsaldean baserrian utzi zuela emakumea, baina gauean ez zela bertan. Harritu egin zen, zeregin batzuk erdizka utzi zituelako, eta SOS Deiak-era deitzea erabaki zuen.
Gaua bilatzeko lanetan igaro dute Ertzaintzak, Gipuzkoako suhiltzaileek eta Azpeitiko Udaltzaingoak. Azkenean, Ertzaintzaren Txakur Unitateak topatu du, gaur 09:00etan, bere baserri inguruan, Azpeitiko Odria auzoan (Gipuzkoa). 61 urte ditu emakumeaak, eta ezponda batean erorita topatu dute: hanka batean min hartuta zegoen, eta ezin zen mugitu. Bertatik atera dute, eta anbulantzian eraman dute Donostia ospitalera.