Tokiko erakundeei begira jarri da Seaska, ministerioaren atea itxita

Tentsioa areagotzen ari da Seaskako irakasle postuak direla eta. Gero eta ikasle gehiago dauzkate Lapurdiko, Nafarroa Behereko eta Zuberoako ikastolek, baina ez dizkiete onartzen haiei kasu egiteko adina irakasle. Iaz baino 230 ikasle gehiago dituzte aurten, eta Seaskak dio 25 irakasle behar dituela gorakada horri erantzuteko; ministerioak, berriz, bost postu eta erdi eman dizkio, eskatutakoen laurdenak ere ez. Atzo arratsean bilera egin zuten Seaskako ordezkariek eta Bordeleko Akademiako arduradunek, baina ez da berritasunik: estatuak ez du postu gehiago onartuko. Ate hori itxita, bi bide jorratuko ditu Seaskak, Hur Gorostiaga zuzendariak aurreratu duenez. Batetik, protestak gogortuko dituzte —larunbatean Pauera joango dira—; bestetik, ardura hartzeko eskatuko diete tokiko instituzioei. Hasi dira mugimenduak: EEP Euskararen Erakunde Publikoa aztertzen ari da Seaskari aparteko diru laguntza ematea. Hala jakinarazi dio Beñat Arrabit lehendakariak BERRIAri.

Joan den ikasturte amaieratik daude gatazka betean Frantziako Hezkuntza Ministerioa eta Seaska, aurtengo ikasturtean zenbat irakasle postu finantzatu. Hilabeteotan hainbat aldiz atera dira kalera ikastoletako irakasleak, gurasoak eta ikasleak, Kasu, ikastola kexu! lelopean. Azkena, joan den ostiralean, Pauen: Akademia Ikuskaritzaren bulegora joan ziren Seaskako dozenaka partaide. Ikuskariarekin elkartu ziren, baina ez zuten emaitzarik lortu. «Ez dut baliabide gehigarririk banatzerik. Jadanik banatutakoa zentzuzkoa da». Erantzun hori eman zien ikuskariak Seaskako kideei.

Baionan izan zuten beste bilera bat atzo arratsaldean, eta gisa berekoa izan zen emaitza. Alde batean, Seaskako ordezkariak; bestean, Bordeleko Akademiako arduradunak, Olivier Dugrip errektorea bera buru. Eta, bitartekari modura, EEPko ordezkariak, Arrabit lehendakaria tartean zela —Euskal Elkargoko Euskara arduraduna ere bada Arrabit jeltzalea—.

Bi egoera erabat desberdin irudikatu zituzten mahaian. Batetik, Seaskak dio «lanjerrean» jarri dutela ikastolen proiektua, eta eskola sartzea «ezinezkoa» izango zela ikastolek ez balituzte beren gain hartu hamalau irakasle postu eta erdi. Errektoreak, berriz, ez du arazorik sumatu eskola sartzean: «baldintza onetan» ekin diote ikasturteari, haren arabera. Dugripek bisita egin zuen atzo goizean Donibane Lohizuneko bi eskolatara. Seaskaren aferaz galdeturik, ez zituen beharrezkotzat jo 25 postuak; «lortzen ahal ez diren anbizioa» dira, haren iritziz.

Larunbatean Pauen

Arratsaldeko batzarrean ere bi jarrera horiek izan zituzten mahai gainean. Behin ikuskariaren eta errektorearen ezezkoak jasota, Seaskako arduradunek galdua daukate esperantza Hezkuntza Ministerioak lanpostu gehiago finantzatu ditzan. «Ez dugu beste erantzunik espero», aitortu du Gorostiagak. Nolanahi ere, ez dute geldirik geratzeko asmorik; ohartarazi dute jokoan ez dagoela soilik aurtengo ikasturtea, baizik eta datozen urteetarako norabidea ere bai. «Hurrengo urterako prestatzen hasi behar dugu».

Protesta deialdiak indartzea erabaki dute, batetik. Larunbat honetan bertan, goizean, Pauera joango dira berriro Seaskako kideak. Ekitaldi ofizial bat egitekoa du Jean-Michel Blanquer Frantziako Hezkuntza ministroak, eta manifestazioa egingo dute inguruan. Irakasle postuen afera ministroari berari helarazi nahi diote protestaren bidez.

Aurtengo postuen auzia alde batera utzita, beste hitzarmen bat egitea proposatu dio akademiak Seaskari. Horretarako bidea hasiko dute datozen asteetan. Itunari esker «garatu» egin da euskarazko irakaskuntza, errektorearen ustez. Ikastolek, berriz, «bermeak» eskatu dituzte ituna egiteko, Hezkuntza Ministerioak ez baitu azken akordioa bete.

Aldaketa handirik ez bada, aurtengo ikasturtean hamalau postu eta erdiren kargu egin beharko du Seaskak bere diru baliabideetatik. Ministerioak atea itxita, tokiko erakundeen erantzukizunari begiratu dio Gorostiagak: bereziki aipatu ditu Euskal Elkargoa, Pirinio Atlantikoetako Departamendua eta Akitaniako Kontseilua. «Esaten dute Seaska oso garrantzitsua dela. Erakuts dezatela».

Arrabit EEPko lehendakariarekin harremanetan jarri da BERRIA, eta adierazi du «lanean» ari direla Seaskaren egoera bideratzeko. Ministerioaren atea itxita nabari du hark ere: «Errektoreak ez du proposamen berririk egin». Horren aurrean zer egingo duten, Arrabitek aurreratu du aztertzen ari direla Seaskari aparteko diru laguntza bat ematea, ikastolek modua izan dezaten beren gain hartutako postuak pagatzeko. Ez du kopururik eta eperik zehaztu nahi oraindik. «Ikusi behar da». Gorostiagak aipatutako hiru erakundeak daude EEPn —elkargoa, departamendua eta kontseilua—, eta haiek aztertuko dute zer egin.

Euskal Elkargoak adierazpen bat egina du Seaskari lanpostu gehiago ematearen alde. Ekaineko osoko bilkuran onartu zuten ebazpena, babes handiz —aurkako boto bakarra—. Herriko etxe ugarik ere agertua diote babesa.