«Terrorismoaren» biktimek elkarteen lana txalotu dute

GASTEIZ. Fernando Buesa fundazioak antolatutako jardunaldiak egin ziren atzo eta herenegun Gasteizko Europa jauregian, eta hainbat elkartek hartu zuten parte. «Terrorismoaren» biktimen kolektiboak bertan izan ziren, eta memoria elkarteek egiten duten lana goraipatu zuten. Haien arabera, elkarteek egiten duten lana funtsezkoa da, etorkizunera begira «memoria» mantendu dadin eta «ETAren terrorismoaren eraginak» gogoratu daitezen. Beharrezkotzat jotzen dituzte elkarteak, «justizia eta duintasuna» aldarrikatzeko. Maite Araluze AVT Terrorismoaren Biktimen Elkarteko presidentearen ustez, pixkanaka ahaztu egin dira biktima horiek, eta azpimarratu zuen berriz lanean hasi beharra dagoela pertsona horiek «ikusgai» egiteko. Consuelo Ordoñez Covite elkarteko lehendakariak, berriz, egiten duten lana izan zuen oinarri: «Batzuk terrorismoa saihesten saiatzen dira; Covitek bizirik iraun beharko du, terrorismoaren ondorioak ez direla desagertzen gogorarazteko».