Telletxea: «Izaskun Bilbao izan da hona etorri den eurodiputatu bakarra»

Lapurdi, Nafarroa Behere eta Zuberoan «oso-oso lasai» doa kanpaina. Hala onartu du Europako Parlamenturako EAJren hautagaiak. «Aste honetan hasi da kanpaina, osteguna da dagoeneko, eta biharko [gaurko] bukatu da», dio, barre etsituari ezin eutsita. Ez du interesik sumatu jendearengan, «eta, okerrago dena, ezta prentsaren aldetik ere». Hala ere, beharrezko ikusi dute hautagaitza propioa aurkeztea Frantzian hego-mendebaldeko deitzen dioten barruti zabal horretan, «Arroxelatik Montpellierrera» doan horretan. Badaki bera ez dela parlamentuan izango, baina «ondoko barrutiko» hautagai jeltzaleak Ipar Euskal Herrian egindako lana nabarmendu du: «Izaskun Bilbao izan da Bruselako arazoez hitz egitera hona etorri den eurodiputatu bakarra».

Frantziako barruti sistemak Ipar Euskal Herriari uzten dion leku murritzaz gain, «politikarien sinesgarritasun faltari» eta herri bozak pasatu berri izanari egozten dio igandeko bozen inguruko giro epela. «Demokrazia arazo bat bada, jendeak beste maila batean ikusten baititu politikariak. Horrek asko eragiten du».

EAJk ahalegina egin du kanpaina Bidasoako mugaren gainetik egiten. Hala dio, behintzat, Telletxeak. Lehen ekitaldia Hondarribian egin zutela gogorarazi du, Donibane-Garazi inguruko alkateekin egon zela Bilbao landa eremuko garapen ekonomikoaz hitz egiten, bilera bat egin zutela Baionan EBBko buru Andoni Ortuzar eta Iñigo Urkullurekin... «Iparraldean asko egin dugu», dio. Gaur, Bilbon egingo dute azken ekitaldia, eta bertan izango da Telletxea ere: «Programa batera egin dugu, eta diskurtso bateratua dugu, euskaldun guztiak hartzen dituena aintzat».

«Balioengatik» ere erabaki dute aurkeztea. «Uste dugu Europak asko egin duela, baina oraingo krisian azalarazi dira eredu baten ahultasunak». Oraingoaren ordez, «eredu soziala» garatu behar dela dio, norbanakoen eskubideak aintzat hartuko dituena. «Eredu hori eraiki behar da enplegua sortuz, hazkundetik. Ekonomia errealera itzuli behar dugu, produkzioan eta formazioan oinarrituta». Horretarako, eredu politikoa ere aldatu beharra dagoela dio: «Europa eraiki duten estatu handiak ez dira lehengoak. Erregioak dira motor kulturan, ekonomian, arlo sozialean. Ikusten da Euskadin, Katalunian, Alemaniako landerretan...».

Euroeskualdearen formularen alde egin du, elkarlana sustatzeko. «Identitate» arrazoiak baztertu gabe, batez ere, «garapenerako aukera garrantzitsua» dela uste du: «Bi herrialderen artean gaude, garapenerako eta elkarlanerako borondatearekin, estatu horiek uzten digutena baino gehiagorako borondatearekin. Tren hori ezin da galdu».

Frantziari begiratuta, «ikaragarria» deritzo Fronte Nazionalaren gorakadari, eta herri bozetan bezala, espero du ez dutela lekurik topatuko Ipar Euskal Herrian. Arretaz begiratuko dio horri igande gauean. Horri, eta EAJren emaitzei, noski. «Hori bizi izan dugu lehen ere. Besteek ez dituzte euskaldunak defendatuko».