Sute handi bat piztu zen atzo 21:05 inguruan Gasteizko Onaindia birziklatze plantan, Artapadura kalean. Ez da inor zauritu, baina gar handiak sortu eta ke handia zabaldu da; horregatik, inguru horretan leihoak ixteko eskatu zuten bart gauean suhiltzaileek, eta zenbait kale moztu behar izan zituzten. Suhiltzaileek 23:30 aldera kontrolatu zuten sua; hala ere, ohartarazi dute egun bat beharko dutela sutea erabat itzali arte. Lekuan jarraitu dute gaur, lanean, urarekin hondakin metak hozten, eta berriz ez pizteko kontrolatzen.
Suhiltzaileek esan dute zaila izan dela sutea mendean hartzea, eta lanak izango dituztela erabat itzaltzeko, haizeak sugarrak zabaldu zituelako, batetik, eta su hartu duten hondakinengatik, bestetik. Onaindia birziklatze zentroan hondakin frakzio ugarirekin egiten dute lan: kartoiak, egurrak, plastikoak, pneumatikoak eta abar edukitzen dituzte. Sutea kontrolatu badute ere, ziurtatu behar dute hondakin gehiagok ez duela su hartuko, eta pixkanaka egiaztatu behar dute ez dagoela gar gehiago.
Cesar Fernandez de Landa Gasteizko Udaleko Segurtasun zinegotziak gaur adierazi duenez, berez sortu da sutea, lehen ikerketen arabera. Kartoiak, egurrak, plastikoak eta pneumatikoak zeuden eremu batean sortu ziren garrak, eta horregatik ere azkar zabaldu zen, eta plastiko errearen usaina aise zabaldu zen hirian. Industriagune batean dago pabiloia, eta errekaren beste aldean etxebizitzak daude, Abetxuku auzoan. Kea eta errautsak beste hainbat auzotara ere zabaldu ziren atzo.
Gasteizko parke guztietako suhiltzaileak aritu dira lanean gauean, eta ez da lanerako egokiera erraza izan. Sutea hasi eta ordubetera, gainera, birziklatze plantaren pabiloi nagusiko teilatua amildu egin zen. Espero dute 24 orduren buruan erabat mendean hartuko dutela egoera.
Airearen kalitateari begira
Bart gauean, sutea piztu eta berehala, kutsadurak gora egin zuen airearen neurgailuetan. PM10 eta PM2,5 partikulen kopuru altuak neurtu zituzten, besteak beste. Leihoak ez zabaltzeko eta kanpoan eskegitako arropa erretiratzeko aholkua eman zuen Gasteizko Udalak, baina gaur goizean bertan behera utzi dute gomendio hori. Udalak ziurtatu du airearen kalitatea «ona» dela orain, eta ez dagoela kezkatzeko motiborik. PM partikulen isuriak maila «normalera» itzuli direla ere ziurtatu dute, eta bart gaueko ezohiko zifrak suteetan gertatu ohi diren mailen barruan zeudela ere ziurtatu du.
Ez da Onaindia birziklatze plantan sortu izan den sute bakarra: 2020ko uztailean beste pabiloi batek su hartu zuen. Egibide kalearen ondoan zegoen su hartu zuen instalazio hura.
