Suprefeturan kateatu dira bederatzi lagun, Lorentxa Gimon askatzea eskatzeko

«Lotzen gara, haiek askatzeko». Presoen aldeko aldarri sinple bat, baina sinbolikoa, atzo Baionan irudikatu zutena. Bederatzi lagun suprefeturako hesietara igota, kateaturik, eta bertara hurbilduriko CRS poliziak kateak puskatzen. Aldarria, metaforikoa: poliziek haiek banan-banan askatu zituzten bezala, aska ditzala Frantziako Gobernuak euskal preso guziak ere. Eta, bereziki, Roazhongo (Bretainia) espetxean larri eri den Lorentxa Gimon preso angeluarra (Lapurdi) baldintzapean aske utz dezatela.

Horixe izan zen atzo eguerdian Baionako Suprefeturan utziriko irudia. Ezker abertzaleko bederatzi militantek —ekintza ez zuten ezein egituraren izenean egin— lotu zuten euren burua Frantziako Gobernuaren ordezkaritza den egoitzara, eta banderoletan preso guziak eta Gimon askatzea galdegin zuten. Oihuen bidez ere bai: Presoak borrokan, gu ere bai; Lorentxa Gimon askatu,Euskal presoak etxera eta halako leloak nagusitu ziren. Kamisetetan ere jantzi zuten aldarria, eta, eri diren presoei keinua eginez, txapel zuriak ezarri zituzten buruan batzuek. Behean, hainbat lagun txaloka eta animoka.

Hiru ordu laurden inguru pasatu zituzten ekintzaileek suprefeturako hesien gainean, harik eta Polizia iritsi eta banaka jaitsarazi zituen arte. Militanteak atxilotu, eta Baionako polizia etxera eraman zituzten segidan. Arratsalderako aske utzi zituzten; Gimonek, ordea, preso segitzen du.

Sostenguak Bretainian

Suprefeturako ekintza ez zen izan atzo Gimon presoak jasotako sostengu bakarra. Hain zuzen, Sylviane Alaux (PS) eta Paul Molac (UDB) diputatuek bisita egin zioten atzo Angeluko presoari Roazhongo espetxera. Bisitaren ondotik, Alauxekin mintzatu zen BERRIA, telefonoz, eta, azaldu zuenez, «fisikoki eta moralki atsekabeturik» atzeman zuen presoa: «Kontuan hartu beharreko errealitate bat da, arlo humanitarioan». «Bake prozesuan» presoen gaia «erdigunean» jarri beharko litzatekeela ohartarazi du Alauxek, eta horregatik ere joan dela euskal presoa ikustera: «Ikuspegi politikotik egin diot bisita 2014ko maiatzetik baldintzapean aske beharko lukeen preso bati, zeina, haren osasun egoera dena izanik ere, ez duten askatzen».

Epailea askatzearen alde agertu zela gogoratu du Alauxek, baina prokuradorearen helegiteagatik segitzen duela Gimonek espetxean. Otsailaren 25ean emanen dute dei auziaren deliberoaren berri.

Anartean, mobilizazioak emendatuz doaz. Atzo bertan, Bretainiako hiriko hainbat hautetsik eskatu zuten Gimon aske uzteko, eta etzi manifestazioa eginen dute Roazhonen haren alde, 14:00etan. Ipar Euskal Herritik bi autobus bete abiatuko dira bihar Bretainiarantz.

Presoei buruz informazio bila etorritako europarlamentariek, berriz, bukatu dute Euskal Herrian egindako itzulia. Etxeratek «positiboki» baloratu ditu europarlamentariek eragileekin egindako bilkurak, eta «fruituak» ematea espero du: «Uste dugu argi geratu direla salbuespenezko kartzela politikak sortzen dituen ondorio larriak. Bisita honek ate bat zabaltzen dio itxaropenari». Apirilean plazaratu beharko lituzkete bisitaren ondorioak.