Ospakizun betean zeuden Gasteizko Judimendi auzoko SUmendi espazio autogestionatuko kideak. Hiru urte bete ditu lokalak egunotan, eta bi asteko ekitaldi sorta bat antolatua zuten, urteurrena ospatzeko —2016ko urrian okupatu zuten—. «Auzoko beharrei» erantzuteko «su txiki baten» gisa definitzen zuten proiektua bertako kideek. Dozenaka ekitaldi egin dituzte urteotan bertan.
Asteazken iluntze honetan, 20:00ak aldera, hitzaldi bat zuten antolatua, urteurreneko ekitaldien barruan. Klima larrialdiari buruz hitz egitekoa zen Mikel Otero EH Bilduko legebiltzarkidea. Baina ertzainak joan dira lekura, eta hitzaldian zeuden lagun guztiak kalera atera eta identifikatu egin ditu haietako batzuk. Segidan, lokalari sarraila aldatu, eta itxi egin dute.
