Spanghero Lur berri kooperatibaren enpresak 42 tona zaldi okel erosi omen ditu Errumanian, goiz honetan LeParisien Frantziako hedabideak jakitera eman duenez. Egunkariak dio ikusi dituen hiru fakturek Spanghero eta Zipreko bitartekari batengana bideratzen dituztela susmoak, zaldi okelarekin egindako lasagnen aferan.
Fakturak Zipreko Draap salerosketa enpresaren izenean dira, bertan kode batek argi uzten omen du haragia zaldikia dela. Spanghero enpresak delako okel hori urtarrilean jaso zuen.
Lur Berriren adarrak salaketa horiek ukatu egin ditu azalduz "inoiz ez zuela Draap Trading enpresaren fakturarik jaso zaldikia aipatzen zuenik".
Zaldi okela, Findus markako idiki hutsez eginak izan behar zuten lasagnetan aurkitu zuten joan den astean. Jaki izoztuak Comigel enpresatik zetozen. Enpresa horri Spanghero enpresak saldu zion okela.
Ikerketa zabalik dago, eta joan den astelehenean ikertu zituzten Spanghero eta bertze enpresa batzuk Frantziako Iruzurraren kontrako agentziako kideek.
Europako Batzordeak jakinarazi du zaldi okela jateak ez duela arriskurik sortzen osasunarentzat. Halere hainbat neurri erabaki zituzten atzo Bruselan bildutako EBko Laborantza ministroek. Horien artean, haragiarekin prestatutako jakiei DNA frogak egitea.
