Sortuk nazio ekitaldia egin du gaur Azpeitian, Txiki eta Otaegiren fusilamenduen 49. urteurrenean. Ehunka lagun elkartu dira Soreasu antzokian, eta «momentua aprobetxatzearen garrantziaz jabetuz», aurrera begira jarri nahi izan du Sortuk. «Independentziara bidean jauzia egiteko, herria aktibatzea eta indarrak norabide berean batzea funtsezkoa» izango dela adierazi du.
Ekitaldian Oihana San Vicentek adierazi du ezker abertzaleak aldi bakoitzeko egoera politikoa «ondo irakurtzen asmatu» duela, eta oraingoa ere aprobetxatu beharra dagoela gaineratu du. Horretarako, «herria aktibatzea, mobilizatzea eta norabide berean eragitea funtsezkoa» izango dela nabarmendu du.
Kapitalismoa borrokatzeko beharra ere azpimarratu du, eta «utopiaren bandera altxatzera» deitu du: «Aberastasunaren banaketan eta justizia sozialean oinarritutako alternatiba delako gurea. Euskal Herri independentea nahi eta behar dugu, nazioa garelako, herria garelako, eta euskal herritarrontzako bizitza hobeak eraiki nahi ditugulako».
