Iratxe Sorzabalen kasuan emandako ebazpenean, Espainiako Auzitegi Nazionalak frogatutzat jo du hura torturatu egin zutela, molde horretako bere lehen epaian. Hala, Sortuk espero du erabakia «mugarria» izatea torturatuen aitortzarako eta erreparaziorako bidean. Izan ere, alderdi horren arabera, tortura sistematikoki aplikatu da Euskal Herrian, eta horren ondorioei erreparatu beharra dago: «Milaka Iratxe daude Euskal Herrian».
Auzitegi Nazionalak atzo argitaratutako ebazpenean, zehazten da Sorzabal torturatu egin zutela deklaratzera behartzeko asmoz, eta ondorioz ezin direla froga gisa onartu orduan adierazitakoak. Sortuk, baina, gogoratu du torturen eraginpean egindako autoinkulpazio horietan oinarrituta zigortu izan duela auzitegi berak Sorzabal, eta horregatik dagoela orain espetxean.
Ikusi gehiago
Are gehiago, torturaren erabilera sistematikoari erreparatu dio, eta horren adibidetzat jarri du Kriminologiaren Euskal Institutuak egindako lana. Institutu horrek 5.394 tortura kasu erregistratu ditu azken urteetan egindako ikerketetan. «Eta, jakina, askoz gehiago ere izan dira», gehitu du alderdiak.
Hain zuzen, Sorturen esanetan, tortura posible izan da haren inguruan sistema oso bat eraiki delako: «Ez ikusiarena egin da sistematikoki, ezkutatu egin da sistematikoki». Hala, torturak eragin dituzten polizien gain ez ezik, haien arduradun politikoen, alderdien, epaileen, auzitegi medikuen eta komunikabideen gain ere jarri du gertatutakoaren ardura, «konplize» izan direlako.
Haiei guztiei eskatu die gertatutakoaren erantzukizuna euren gain hartzeko: «Tortura aitortu behar da, eta erreparaziorako urratsak egin behar dira». Horren parte da, Sorturen esanetan, torturaren ondorioei heltzea ere: batetik, torturaren biktimek jasandako ondorio psikologikoei; bestetik, torturapean egindako autoinkulpazioetan oinarritutako zigorrei. Era berean, adierazi du tortura ez errepikatzeko bermeak ezarri behar direla, eta gehitu inpunitatea amaitu behar dela horretarako.
