Skolaeri buruzko foru dekretua irailerako espero du Nafarroako Gobernuak

Skolae hezkidetza programari lege babesa emango dion foru dekretua irailerako prest edukitzea espero du Nafarroako Gobernuak. Carlos Gimeno Hezkuntza kontseilariak agerraldia egin zuen atzo parlamentuan, EH Bilduk eskatuta, eta gobernuaren babesa adierazi zion berriro Skolaeri. Gogora ekarri zuen hezkidetza programaren aurka Espainiako Auzitegi Gorenak emandako epaiak ez zituela auzitan jarri Skolaeren edukiak, eta soilik forma akatsak azaleratu zituela. Kontseilariak ziurtatu zuen foru dekretuak segurtasun juridikoa emango diola Skolaeri, eta erantsi zuen lanean ari direla programa sare publikoan eta itunpekoan arautzeko.