Gaur kalea hartu dute berriz ere, eta berriro hustu dituzte Arabako, Bizkaiko eta Gipuzkoako ikastetxe publikoak. Irakasleek bederatzigarrenez egin dute greba; oraingoz, antolatutako azkena da. Eta orain, ikusteko dago zer gertatuko den gaurtik aurrera; izan ere, Steilas, LAB, ELA eta CCOO sindikatuek atea zabalik utzi dute greba gehiagotara deitzeko: «Hezkuntza Sailaren deiaren zain egongo gara; negoziatzeko eta ados jartzeko borondaterik azaldu ezean, greba dinamikaren hirugarren fasea planteatzea beste aukerarik ez digute utziko».
Ikusi gehiago
Sindikatuek diote «indartsu» iritsi direla gaurko grebara: «Hezkuntza publikoko irakasleak indartsu iritsi dira bigarren faseko greba dinamikaren bukaerara». Gaur ere, diotenez, grebara deitutako hamar irakasletik zortzik babestu dute deialdia, eta gero eta jende gehiago ari da parte hartzen mobilizazioetan —manifestazioa egin dute gaur Gasteizen—: «Mobilizazioetan milaka langile ari dira elkartzen, eta behin eta berriz salatu dute Hezkuntza Sailaren jarrera».
Abiatu dira manifestazioan greban dauden hezkuntza publikoko irakasleak. Gaur deialdi bateratua egin Dute, eta nabari da. Jende asko elkartu da. @berriapic.twitter.com/Si6C4n60uH
— Kerman Garralda (@kaguendix) April 2, 2025
Gasteizko erdigunetik abiatu da manifestazioa, Europa jauregitik. Eusko Jaurlaritzaren Lakuako egoitzara jo dute, eta hogei bat minutuz Gasteiz blokeatzea lortu dute: tranbia zerbitzua eten egin behar izan dute, autobusak geltokitik sartu eta irten ezinik egon dira, eta gorabeherak izan dira trafikoan. Horren luzea zen manifestazioa, ezen Eusko Jaurlaritzaren egoitza erabat inguratzea lortu baitute. Azkenean, Jaurlaritzaren egoitza aurreko belardi batean elkartu dira denak. Hainbat grebalarik bertan igaro dituzte azkeneko bi gauak.
Argi dute zer eskatzen dioten Eusko Jaurlaritzako Hezkuntza Sailari. Bata bestearen atzetik zerrendatu dituzte aldarrikapenak: lan zamak arintzea; lantaldeak gaztetzeko «plan egokia» ezartzea; lanpostu publikoak bermatzea eta egonkortzea, erosahalmena berreskuratzea; eta lan osasuna, euskara eta hezkidetza bermatzeko proposamenak egitea.
Gogorarazi dute hamabost urte daramatzatela lan hitzarmena eguneratu gabe. «Aski da!». Finean, honatx eskaera: «Hezkuntza publikoa indartzeko, ezinbestekoa da inbertsioa handitzea, lan baldintzak hobetzea eta eskola publikoa baliabideez hornitzea». Eta zera ohartarazi dute: «Ez bazaie erantzuten aldarrikapen hauei, grebak egiten jarraitzeko indarrez gaude».
Zehaztapen eske
Bide horretan, «negoziazio erreala» galdegin diote Hezkuntza Sailari. Eta «zehaztapenak» nahi dituzte, «idatziz jasotako proposamenak», baita haiek negoziatzeko mahaiak antolatzea ere, «inolako baldintzarik gabe»: «Akordioak edukiak eta zehaztapenak behar ditu».
Begoña Pedrosa Hezkuntza sailburuak erantzun die eskua luzatuta duela, baina negoziazioak «serioa eta emankorra» izan behar duela, «benetan eraginkorra izan dadin». Gogorarazi du «denbora tarte txikian garrantzi handiko beste akordio batzuk» sinatu direla, Haurreskolak partzuergoko, sukaldeetako eta garbiketako langileen kasuari erreferentzia eginez, eta horiek «urte luzeetako negoziazioaren ondorioz» izan zirela. Hezkuntza sistema ahalik eta gehien hobetzeko nahia adierazi du.
