2024ko lehen hiru hilabeteetan handitu egin zen sexu askatasunaren aurkako delituei lotutako salaketen kopurua Hego Euskal Herrian, baita bortxaketa salaketen kopurua ere, iazko epe berarekin alderatuta. Espainiako Barne Ministerioak emandako kriminalitate datuen arabera, aurtengo urtarriletik martxora bitarte 238 delituren berri izan zuten polizia indarrek, 2023ko garai berean baino 65 gehiago. Horien artean, 85 bortxaketa salaketa jaso zituzten, iaz baino hamabi gehiago.
Lurralde guztietan egin dute gora sexu askatasunaren aurkako delituei lotutako salaketek hiru hilabeteotan: Araban %173, Gipuzkoan %43, Bizkaian %23, eta Nafarroan %22. Bortxaketei dagokienez ere, salaketa gehiago aurkeztu dituzte Gipuzkoan (26 guztira, iaz baino %73 gehiago), Araban (hamabi, %71 gehiago) eta Bizkaian (37, %15 gehiago), baina Nafarroan apaldu egin da kopurua (hamar salaketa, iaz baino %47 gutxiago).