Gipuzkoako Fiskaltzak sei urteko kartzela zigorra eskatu du Ertzaintzako patruilaburu batentzat. Leporatu diote ustezko droga trafikatzaile bat estutu izana kokaina emateko eta, trukean, epaiketan onurak agindu izana. Fiskaltzak funtzionario eroskeria eta desleialtasun delituak egotzi dizkio, ustez polizia idazki bat ere lapurtu zuelako.
Kartzela zigorraz gainera, fiskaltzak isuna ere eskatu du ertzainarentzat, 10.800 eurokoa. Baita edozein kargu eta lanpostu publikotarako inhabilitatzea ere hamalau urtez.
Gipuzkoako Probintzia Auzitegiko Lehen Atalak ostiralean abiatuko du ertzainaren kontrako epaiketa; astelehenera bitarte iraungo du, eta orduan hasiko da deliberazioetarako tartea. Ustezko droga trafikatzaileak ezingo du epaiketan deklaratu, 2020ko uztailean hil baitzen.
Dirua mesedeen truke
2020an kontrol prebentibo batean, gizon bati drogak konfiskatu zizkioten, eta atxilotu egin zuten. Orduan, fiskaltzaren arabera, akusatuak atxilotuarekin hitz egin zuen kartzelan, «bere eskumenak gaindituta». Besteak beste, 1.700 euro eta konfiskatutako eskuko bi telefono berreskuratuko zituela agindu zion, eta horregatik bostehun euro eskatu zizkion. Gainera, bere telefono zenbakia idatzi zion besoan, eta mehatxu egin zion: esan zion «txiki-txiki egingo zuela» kolaboratzen ez bazuen eta ez bazion deitzen aske uzten zutenean.
Gizonak, aske geratu zenean, poliziari deitu zion, eta bere etxean gelditu ziren. Bertan, fiskaltzaren esanetan, biek kokaina kontsumitu zuten, eta, alde egin aurretik, ertzainak beste gramo erdi bat kokaina hartu zuen, «oparitxo» gisa eta 1.700 euroak berreskuratzeko ordain gisa.
Ondorengo egunetan, ustez droga trafikatzen zuen gizonak dosi gehiago eman zizkion poliziari. Gainera, ertzainak eskatu zion izen zerrenda bat emateko, bestela bere kontrako epaiketan «galtzen aterako zela» mehatxatuta.
